Þróun á samræmdum verklagsreglum innan lögreglunnar um vinnulag og skráningu hatursglæpa gagnvart hinsegin fólki er meðal aðgerða sem nefndar eru í drögum að nýrri aðgerðaáætlun stjórnvalda í málefnum hinsegin fólks á árunum 2026-2029. Þetta verkefni verði unnið í samstarfi við Samtökin '78, jafnréttisnefnd og þjónustusvið Embættis ríkislögreglustjóra. Sérstök áhersla verði lögð á greiningu gagna, notkun hugtaka og rétt viðmót í málsmeðferð. Markmið aðgerðarinnar verði að tryggja sýnilega, samræmda og réttindamiðaða meðferð hatursglæpa gagnvart hinsegin fólki.

Framhald af fyrri áætlun

Aðgerðaáætlunin er önnur aðgerðaáætlunin stjórnvalda í málefnum hinsegin fólks og tekur hún gildi um næstu áramót. Í aðgerðaáætlunininni eru 34 aðgerðir, meðal annars áform um réttarbætur, stuðning, rannsóknir, fræðslu og vitundarvakningu í þágu hinsegin fólks á öllum aldri. 

Þessi áætlun tekur við af fyrstu aðgerðaáætlun í málefnum hinsegin fólks fyrir árin 2022 til 2025. Þær breytingar sem hún stuðlaði að eru til að mynda að hatursorðræða á grundvelli kyneinkenna var gerð refsiverð og lagður var grunnur að afnámi banns við blóðgjöfum karla sem stunda kynlíf með öðrum körlum með breytingu á reglugerð um blóðskimanir. Því ferli er framhaldið með aðgerð um afnám bannsins í þessari aðgerðaáætlun. 

34 aðgerðir nú samanborið við 21 áður

Ný aðgerðaáætlun stjórnvalda í málefnum hinsegin fólks felur í sér lýsingu á stefnu stjórnvalda á málefnasviði hinsegin mála, beinar aðgerðir til að varpa ljósi á stöðu málaflokksins og/eða stuðla að framförum á sviði hinsegin málefna. Aðgerðir innan aðgerðaáætlunarinnar eru talsvert fleiri en innan fyrri aðgerðaáætlunar í málefnum hinsegin fólks eða 34 samanborið við 21 í fyrstu aðgerðaáætluninni. Öll ráðuneyti nema eitt bera ábyrgð á einni eða fleiri aðgerðum í áætluninni og fjölmargar undirstofnanir taka þátt í framkvæmd þeirra.

Mikilvægt að Íslendingar beiti sér gegn  bakslaginu

Áætlunin hefur verið birt í samráðsgátt stjórnvalda. Þar segir að með aðgerðum í málefnum hinsegin fólks til áranna 2026–2029 leggi stjórnvöld sig fram um að stuðla að bættum réttindum, aðstæðum, viðurkenningu og þátttöku hinsegin fólks í samfélaginu. Mikilvægt sé að þjóðir eins og Íslendingar beiti sér gegn bakslagi á sviði hinsegin mannréttinda og sæki fram bæði á heimavelli og út á við.