Vísitala neysluverðs hækkaði um 0,84 prósent í júní, samkvæmt nýjustu tölum Hagstofunnar. Vísitala án húsnæðis hækkaði um 0,90 prósent. Þetta þýðir að tólf mánaða verðbólga – sem er það sem gjarnan er átt við þegar talað er um verðbólgu – mælist nú 4,2 prósent. Það er hækkun frá síðasta mánuði, þegar verðbólgan mældist 3,8 prósent.

Verðbólga hefur sveiflast í kringum fjögur prósent síðan í febrúar. Þá mældist hún 4,2 prósent, lækkaði í 3,8 prósent í mars, hækkaði aftur í 4,2 prósent í apríl og féll svo á ný í 3,8 prósent í maí. Þessar mælingar minna á þróunina vor og sumar 2021, þegar verðbólgan hélt sig rétt yfir fjögur prósent í nokkra mánuði, áður en hún rauk upp í nær tíu prósent fram á sumarið 2022.

Helstu liðir sem drógu verðbólguna upp nú í júní voru flugfargjöld til útlanda, sem hækkuðu um 12,7 prósent og höfðu 0,27 prósent áhrif á …