Gríðarlegar sviptingar urðu um helgina á stjórn Sósíalistaflokksins þar sem hópur fólks úr grasrótinni bauð sig fram til höfuðs þeim sem höfðu farið með völd í flokknum síðastliðin ár. Gunnar Smári Egilsson, stofnandi flokksins og formaður framkvæmdastjórnar til átta ára, hlaut ekki kjör í framkvæmdastjórn.
Á aðalfundinum var meðal annars kosið í framkvæmdastjórn, málefnastjórn og kosningastjórn. Um einstaklingskjör var að ræða en mikill hiti var í flokksmönnum fyrir fundinn. Þannig var svokölluðum tossalista – „Leiðbeiningum til að styðja við grasrótarendurreisn Sósíalistaflokksins“ – dreift fyrir fundinn.
Þar kom fram að „mikilvægast“ á dagskránni væri kosning í stjórnirnar. Síðan voru birt nöfn þeirra sem æskilegt væri að kjósa, fyrir þá sem styddu endurreisn grasrótarinnar.
Sósíalistaflokkurinn birti sundurliðaðar niðurstöður á vef sínum í morgun þar sem má sjá í heild sinni þá sem náðu kjöri í stjórnirnar og í hvaða röð. Athygli vekur hversu líkir þeir eru áðurnefndum lista.
Níu fulltrúar voru kjörnir í framkvæmdastjórn sem aðalstjórnarmenn:
- Bergljót Tul Gunnlaugsdóttir
- Guðbergur Egill Eyjólfsson
- Hallfríður Þórarinsdóttir
- Hjálmar Friðriksson
- Jón Ferdínand Estherarson
- Karl Héðinn Kristjánsson
- Sæþór Benjamín Randalsson
- Sigrún Unnsteinsdóttir
- Þorvaldur Þorvaldsson
Fjórir fulltrúar voru kjörnir í framkvæmdastjórn sem varamenn í stjórn:
- Marzuk Ingi Lamsiah Svanlaugar
- Rósa Guðný Arnardóttir
- Sigurjón Ármann Björnsson
- Sigurrós Eggertsdóttir
Allir sem náðu kjöri sem aðalmenn í málefnastjórn eru á ofangreindum lista og í sömu röð, en röðun varamanna er önnur. Þá eru efstu tvær á ofangreindum lista samhljóða endanlegum niðurstöðum, en annað fólk á listanum náði kjöri þó röð þeirra sé önnur.
Kosningastjórn var sömuleiðis skipuð öllum þeim aðalmönnum sem andófsmenn höfðu mælt með að yrðu kjörnir.
Sanna Magdalena Mörtudóttir, borgarfulltrúi og forseti borgarstjórnar, hlaut kjör sem pólitískur leiðtogi flokksins en hún sagði sig hins vegar af sér því embætti eftir að niðurstöðurnar voru ljósar: „Í ljósi aðdragandans að þeim breytingunum sem síðar urðu á aðalfundi Sósíalistaflokks Íslands hef ég tekið þá ákvörðun að segja mig frá trúnaðarstörfum í innra starfi flokksins. Ég verð áfram skráð í flokkinn og mun beina öllum mínum kröftum að starfi mínu sem oddviti borgarstjórnarflokksins. Mitt helsta markmið í lífinu er að vinna gegn efnahagslegu óréttlæti,“ skrifaði hún á Facebook í kjölfarið.
Hinn listinn
Sanna hefur stutt Gunnar Smára og birti hún á Facebook-síðu sinni fyrir aðalfundinn lista yfir hvernig hún myndi kjósa. Báðar fylkingar höfðu því dreift nafnalistum með „sínu fólki.“
Hér er listinn yfir þá sem Sanna sagðist ætla að kjósa í framkvæmdastjórn:
1. Sara Stef Hildar
2. Kári Jónsson
3. Gunnar Smári Egilsson
4. Margrét Pétursdóttir
5. Laufey Líndal Ólafsdóttir
6. Jón Hallur Haraldsson
7. Ragnheiður Guðmundsdóttir
8. Þorsteinn Bergsson
9. Hákon Leifsson
Til vara:
1. Kolbrún Valvesdóttir
2. Luciano Dutra
3. Haraldur Ingi Haraldsson
4. Védís Guðjónsdóttir
Athugasemdir (1)