Ef þú gætir sagt hvað sem er við Trump, hvað myndir þú segja?
„Kauptu Grænland.“
Svona byrjar myndband með hinum grænlenska Timmy Zeeb, sem stuðningsfólk Donalds Trumps Bandaríkjaforseta hefur deilt á samfélagsmiðlum, rétt eins og forsetinn sjálfur gerði á samfélagsmiðli sínum Truth Social.
„Grænland er ótrúlegur staður og fólkið þar mun græða virkilega mikið á því ef, og þegar, landið verður hluti af okkar þjóð. Við munum vernda það frá mjög grimmum heimi. GERUM GRÆNLAND GEGGJAÐ AFTUR!“ skrifaði forsetinn með myndbandinu.
Sonur Trumps, Donald Trump Jr., heimsótti Grænland á dögunum og vakti það mikla athygli vegna yfirlýsinga Trumps um að honum hugnist að ná undir sig Grænlandi.
Sakaferill Zeebs vekur athygli
Deilingar Trumps og stuðningsfólks hans á myndbandinu af Zeeb hafa orðið fréttamatur danskra og grænlenskra fjölmiðla af þeim sökum að Zeeb á langan sakaferil að baki. Hann var meðal annars dæmdur í fjögurra ára fangelsi í einu stærsta hassmáli Grænlands árið 2019 og var talinn lykilmaður í því máli.
Þegar hann sat í fangelsi 10 árum áður þurfti að lýsa eftir honum því honum hafði tekist að flýja úr fangelsinu, samkvæmt grænlenska miðlinum Sermitsiaq sem segir Zeeb þekktan fyrir hættulega glæpi.
Þegar danska ríkisútvarpið hafði samband við Zeeb í gær og óskaði eftir viðtali sagðist hann ekki hafa tíma í það. Í skriflegum skilaboðum sagðist hann hafa hitt fólk Trumps fyrir tilviljun og að fortíð hans á glæpabrautinni eigi ekki að draga úr hæfi hans til þess að hafa skoðun á mögulegri yfirtöku Bandaríkjanna á landinu.
„Fjandinn sjálfur, nei. Allir eiga rétt á sínum skoðunum,“ skrifaði Zeeb og tók fram að hann hefði ekki fengið neitt greitt fyrir þátttöku sína í myndbandinu.
Í því segir Zeeb Dani misnota sér Grænlendinga og auðlindir þeirra. Því hugnist honum hugmyndir um sameiningu við Bandaríkin vel.
„Kauptu okkur! Kauptu Grænland.“ Við viljum ekki vera nýlenduríki Dana lengur,“ segir Zeeb, með Trump derhúfu á höfðinu.
Athugasemdir (2)