Klukkan er sjö um morgun og fólk tínist inn í anddyri Vesturbæjarlaugarinnar enn með stírur í augunum. Eftir hálftíma mun hópur fólks taka þátt í Müllersæfingum á sundlaugarbakkanum. Þetta gerist á sama tíma alla virka daga en að baki því er fjögurra áratuga hefð.

Vinir Dóra, rótgróinn hópur sem iðkar þessa leikfimi samviskusamlega, samanstendur mestmegnis af fólki sem komið er yfir miðjan aldur. Þó hefur talsvert af yngra fólki farið að láta á sér bera upp á síðkastið. Aðfarirnar eru leiddar áfram af mikilli innlifun af forystumanninum Dóra.

Lækkuðu meðalaldurinn

Í móttökunni skýrir Iðunn Gígja Kristjánsdóttir, sem er 24 ára, fyrir blaðamanni að hún hafi byrjað að mæta í sund á morgnana vegna þess að kærasti hennar og vinur hafi farið að stunda það. En upphaflega mættu þau alltaf í Vesturbæjarlaug klukkan átta. „Þetta fór að vinda upp á sig og fleiri fóru að mæta. Á einhverjum tímapunkti komst einhver …