Börn og unglingar geta valið úr alþjóðlegum verðlaunamyndum, skellt sér á spennandi námskeið og stigið inn í göldrótta veröld bíómynda – í Bíó Paradís. Veröld sem opnar heiminn en verndari hátíðarinnar er Vigdís Finnbogadóttir.
Í ár er þema hátíðarinnar teiknimyndagerð eða animation. Opnunarmyndin er ævintýramyndin Kisi en hún fjallar um hinn einmana kisa sem finnur skjól á báti eftir flóð, þar búa alls konar dýr og hefst þar með ferð þar sem samvinna dýranna skiptir sköpum. Myndin vann áhorfendaverðlun á Annecy-teiknimyndahátíðinni 2024. Hún er án tals og er við hæfi níu ára barna og eldri.
Jólamynd fyrir yngri börnin
Yngri börn geta m.a. hlakkað til að sjá jólamynd. En frumsýnd verður myndin Jólaævintýri dýranna – sem byrjar svo í almennum sýningum þann 27. nóvember. Hún er talsett á íslensku og er ævintýri um norðurslóðir. Jólatöfrar fléttast saman við fimm hugljúfar sögur eftir fimm konur sem eru allar evrópskir leikstjórar.
Námskeið fyrir krakka
Þá geta m.a. börn á aldrinum 8–10 ára skellt sér á námskeið í skapandi teiknimyndagerð hjá Unu Lorenen, leikstjóra og listamanni. Og stelpum á aldrinum 10–12 ára er bent á námskeiðið Stelpur leika! Þar verður farið í saumana á hvernig á að undirbúa sig fyrir áheyrnarprufur og leika í kvikmynd. Vigfús Þormar Gunnarsson leiðbeinir, en hann er séræfður í leikaravali fyrir kvikmyndir, sjónvarp og auglýsingar.
Veglega dagskrá hátíðarinnar má finna á heimasíðu Bíó Paradís. Nánar tiltekið á: https://bioparadis.is/vidburdir/barnakvikmyndahatid-2024/
Kvikmyndafræðsla fyrir grunnskóla
Alþjóðlega barnakvikmyndahátíðin og Bíó Paradís standa einnig fyrir kvikmyndafræðslu fyirr grunnskóla. Því verður jafnframt boðið upp á skólasýningar á verðlaunamyndum fyrir börn og unglinga. Boðinu er beint til allra grunnskóla á landsbyggðinni í samstarfi við List fyrir alla. Rafrænt kennsluefni fylgir myndunum en það gerði kvikmyndafræðingurinn Oddný Sen sem séð hefur um kvikmyndafræðslu í Bíó Paradís. Myndirnar verður hægt að sjá á Heimabíó Paradís, en þar verður að finna hlekk á rafrænt kennsluefni frá 30. október–1. nóvember 2024.
Þá verður einnig boðið upp á skólasýningar fyrir börn og ungmenni á höfuðborgarsvæðinu. Kennarar geta endurgjaldslaust pantað sæti fyrir bekkinn sinn á skólasýningarnar með skráningu í tölvupósti á netfangið: lisa@bioparadis.is En þar þarf að gefa upp nafn og netfang kennara, fjölda nemenda og aldur þeirra – fyrir 21. október.
Stanslaus hátíð fyrir fullorðna!
Fullorðnir geta líka reimað á sig bíóskóna og búið sig undir fjörmikla dagskrá í Bíó Paradís í haust, bæði bíómyndir og heimildamyndir. Að vanda verða fastir viðburðir eins og Föstudagspartísýningar og Svartir sunnudagar og Bíótekið og Miðvikudagsbíó – svo stiklað sé á stóru. En það verður líka boðið upp á nýjan dagskrárlið sem kallast: Kvöldstund með … Þá geta bíógestir hitt þekkta kvikmyndagerðarmenn, innlenda og erlenda, á sýningum eða frumsýningum mynda.
Strax núna 31. október mætir danska leikkonan Trine Dyrholm á næstu kvöldstund, en hún leikur eitt aðalhlutverkið í myndinni sem sýnd verður fyrir spjallið og heitir Stúlkan með nálina eftir Magnus von Horn. Þess má geta að hún dvelur nú hér á landi við tökur á þáttaröðinni Danska konan í leikstjórn Benedikts Erlingssonar.
Svo nú er bara að fá sér popp & kók eða bjór & popp – týna sér í bíó og hitta sálufélaga sína. Jafnvel lenda á séns í fordyrinu – ef þú ert á lausu og fullorðinn áhorfandi á seiðandi kvöldsýningu. Já, eða bara ein/einn að hanga á sunnudegi í rómantík bíóveraldarinnar ! Og ... ! Kannski má bara búa til barn eftir bíóið og fara síðan með það á kvikmyndahátíð fyrir börn – og njóta þess að vera krakki að uppgötva veröldina. Í veröld kvikmyndanna getur jú allt gerst.
Athugasemdir