Í nýrri prent­miðla­könnun Gallups sem kom út í dag er stað­fest að Heim­ildin hefur sér­staka styrk­leika í lestri hjá konum, yngra fólki, háskóla­mennt­uðum, tekju­háum og höf­uð­borg­ar­búum.

Þrátt fyrir að lestur prent­miðla hafi í heild­ina minnkað á síð­ustu tveimur ára­tugum hefur lestur Heim­ild­ar­innar til lengri tíma auk­ist frá því henni var breytt í viku­blað í apríl í fyrra eftir að útgáfu frí­blaðs­ins Frétta­blaðs­ins var hætt.

Heim­ildin hefur þannig náð að verða leið­andi í lestri hjá til­teknum hópum. Hún mælist mest lesni prent­mið­ill­inn á land­inu hjá háskóla­mennt­uðum konum (18,1%), en mun­ur­inn er afger­andi þegar litið er ein­göngu til Reykja­víkur (21,2%) eða höf­uð­borg­ar­svæð­is­ins alls (20,3%). 

Heim­ildin mælist með 14,7% lestur á lands­vísu að með­al­tali á þriðja árs­fjórð­ungi 2024, en land­fræði­lega er mestur er lestur hennar í Reykja­vík norður, þar sem hún er mest lesin allra prent­miðla.

Á heim­ilum yngra fólks mælist Heim­ildin sterk. Í ald­urs­hópnum 30 til 50 ára í Reykja­vík (18,7%) og á höf­uð­borg­ar­svæð­inu öllu (14,2%) lesa fleiri Heim­ild­ina en nokkurn annan prent­miðil.

Helst skilur á milli prent­miðla í lestri hjá elsta ald­urs­hópnum, frá 60 til 80 ára, en þar mælist Morg­un­blaðið (42,2%) tölu­vert hærra í lestr­ar­mæl­ingu en Heim­ildin (24,9%). Lestur Morg­un­blaðs­ins jókst heilt yfir eftir að Frétta­blaðið hætti útgáfu en hann er nú sá sami og árið 2020, eftir skart fall í lestri fram að þeim tíma. Lestur Heim­ild­ar­innar hefur sveifl­ast frá 13,8 til 15,6% frá 2023.

Neysla á fjöl­miðlum hefur tekið miklum stakka­skiptum síð­ustu árin sam­hliða til­komu fleiri miðla. Áhorf á línu­lega sjón­varps­dag­skrá í heim­inum hefur ekki síður lækkað en lestur prent­miðla. Nú horfa um 24% lands­manna á sjón­varps­fréttir RÚV og lið­lega 16% á veð­ur­fréttir.

Fyr­ir­vari um hags­muni: Í grein­inni er fjallað um Heim­ild­ina.