Popúl­ismi er partur af íslensku flokka­kerfi, því miður, sagði Svandís Svav­ars­dóttir inn­við­a­ráð­herra í við­tali við Heim­ild­ina í síð­ustu viku, spurð hvort hún teldi íslenska stjórn­mála­menn eiga það til að fiska í grugg­ugu vatni, með nálgun sinni á mál­efni útlend­inga. 

Ekki vildi Svandís nefna nein sér­stök dæmi í sam­tali sínu við blaða­mann, en sagði að það væri „ákveðin til­hneig­ing á Vest­ur­löndum þessi miss­erin til þess að kyn­þátta­for­dómum og útlend­inga­hatri vaxi ásmegin“ og „mjög alvar­legt þegar stjórn­mála­flokkar nýta sér slíkar hreyf­ingar og gefa þeim lög­mæti með því að nota þær í póli­tískri orð­ræðu“. 

„Því við vitum að ef stjórn­málin taka sér áherslur í munn af þessu tagi, þá fær­ast normin í sam­fé­lag­inu og þetta sjáum við alls staðar í lönd­unum í kringum okkar, að þegar við erum komin með stjórn­mála­flokka og stjórn­mála­hreyf­ingar sem gera sér mat úr andúð á fólki úr öðrum menn­ing­ar­heimum eða af öðrum upp­runa, þá aukast líkur á því að það verði hluti af almennri umræðu. Þar með verður óör­uggt fyrir fólk af erlendum upp­runa að vera þátt­tak­andi í sam­fé­lag­inu,“ sagði Svandís.

Innviðirnir áskorun, ekki fjöldinn

Svandís sagði einnig að ef umræðan hér­lendis þró­að­ist með þeim hætti, að fjölgun fólks af erlendum upp­runa í sam­fé­lag­inu – og þar sé hópur flótta­fólks og umsækj­enda um alþjóð­lega vernd lítið brot – sé orðin vanda­mál, sé það birt­ing­ar­mynd þess að treysta þurfi inn­viði sam­fé­lags­ins. 

„Stóru áskor­an­irnar snú­ast ekki um fjöld­ann sem kemur, heldur um inn­gild­ing­una og inn­við­ina og að við stór­aukum áherslu á að inn­flytj­endur geti í raun og veru verið þátt­tak­endur í íslensku sam­fé­lagi,“ segir Svandís. Þessum áskor­unum, líkt og mörgum öðrum, segir Svandís að verði ekki mætt með lausnum mark­að­ar­ins.

Nánar er rætt við Svandísi Svav­ars­dóttur inn­við­a­ráð­herra í nýjasta tölu­blaði Heim­ild­ar­innar. Viðtalið í heild sinni má lesa hér.