Þórður Snær Júlíusson, fyrrverandi ritstjóri Heimildarinnar, hefur greint frá því að hann hefði ákveðið að taka þátt í skipulögðu stjórnmálastarfi í fyrsta sinn á ævi sinni og skrá sig í Samfylkinguna. Frá og með komandi mánaðarmótum muni hann sinna ákveðnum verkefnum tengdum stefnumótun fyrir flokkinn.
Þetta tilkynnti hann í fréttabréfi sínu, Kjarnyrt, og á Facebook-síðu sinni í morgun.
„Ég tel, eftir töluverða yfirlegu og fjölmörg samtöl, að þar sé að finna þá pólitík sem mér hugnast best og fer saman við þær áherslur sem ég vil sjá að séu ráðandi í samfélaginu. Nú er tíminn til að knýja fram réttlátar breytingar á Íslandi og Samfylkingin, sem hefur opnast og breikkað með innkomu og undir forystu Kristrúnar Frostadóttur, er að mínu mati aflið til að leiða þá vegferð. Ég vil taka þátt í því stóra verkefni af fullum krafti og leggja mitt lóð á vogaskálarnar fyrir betra samfélagi,“ skrifar Þórður.
Hann skýrir að hann hafi í tæpa tvo áratugi unnið við að greina það sem sé að. Nú langi hann að búa til lausnir fyrst hann sé ekki lengur starfandi blaðamaður.
Þá segir Þórður að hann sé hættur að greina efnahagsmál og samfélag í Morgunvakinni á Rás 1. En það hefur hann gert vikulega frá árinu 2019. „Það passar ekki saman, að mínu viti, að taka þátt í skipulögðu flokksstarfi og sinna því hlutverki.“
Þórður Snær sagði skilið við Heimildina síðsumars. Í gær ákvað lögreglustjórinn á Norðurlandi eystra að fella niður rannsókn á honum og fimm öðrum blaðamönnum vegna umfjöllunar þeirra um svokallaða Skæruliðadeild Samherja. Við það tilefni skrifaði Þórður á Facebook að málið hefði breytt sýn sinni á samfélagið og haft áhrif á það að hann hefði ákveðið að skipta um kúrs í lífinu.
„Það hefur sýnt mér að ef maður stendur ekki upp og berst fyrir því sem er réttlátt, sanngjarnt og satt, jafnvel þótt að valdamesta fólk landsins sé mótaðilinn, þá gerir það enginn fyrir mann. Þetta má aldrei gerast aftur og ég ætla að beita mér að öllu afli fyrir því.“
Athugasemdir