Ásjöunda tug mótmælenda eru nú staddir fyrir utan Alþingishúsið. Félagið Ísland - Palestína stendur fyrir mótmælunum og krefjast þau þess að íslenska ríkið setji viðskiptaþvinganir á Ísrael og slíti stjórnarsambandi við ríkið vegna hernaðar Ísraels á Gazasvæðinu. 

Hróp og köll frá hópnum heyrðust skýrt alla leið inn í þingsal Alþingis við upphaf þingfundar klukkan þrjú í dag. Hópurinn kallaði:  „Frjáls, frjáls Gaza, leyfið Gaza að lifa,“  og upp á enskuna „Free, free Rafah, ceasefire now.“

Á blöðum sem nú er deilt út til mótmælenda er þess krafist, auk kröfu um viðskiptaþvinganir og slit á stjórnarsamstarfi, að Ísland styðji málsókn Suður-Afríku á hendur Ísrael við Alþjóðadómstólinn og þess að utanríkisráðherra Íslands hafi frumkvæði að samtali við Norðurlöndin, Írland og Spán um samhæfingu aðgerða.

Nokkuð hefur borið á mótmælum gegn hernaðaraðgerðum Ísraela hér á landi síðan stríð hófst í byrjun október eftir innrás Hamasliða í Ísrael þann sjöunda október síðastliðinn þegar tæplega 1.200 Ísraelar týndu lífi og um 250 voru teknir sem gíslar. Ísraelsher brást við með áður óséðu offorsi og hefur þegar drepið að minnsta kosti 36 þúsund Palestínumenn, mest börn og konur. 

Guðrún og Þórhildur tókust á

Aukin harka hljóp í viðbrögð við mótmælum gegn árásum Ísraelshers í síðustu viku þegar lögreglumenn úðuðu piparúða á mótmælendur sem mótmæltu fyrir utan ríkisstjórnarfund. Þeir höfðu truflað för ráðherrabílanna. 

Þórhildur Sunna Ævarsdóttir, þingkona Pírata, spurði Guðrúnu Hafsteinsdóttur dómsmálaráðherra um atvikið í óundirbúnum fyrirspurnum nú síðdegis. Hún vitnaði í ummæli Guðrúnar um það: 

„Ísland er lýðræðisríki og í lýðræðisríkjum virðum við rétt fólks til að tjá skoðanir sínar með friðsamlegum hætti en um leið og farið er gegn skýrum fyrirmælum lögreglu eru mótmæli ekki lengur friðsamleg.“

Þórhildur kallaði þetta afskræmingu á rétti borgaranna til friðsamlegra mótmæla. Guðrún svaraði því til að mótmælendurnir hefðu hindrað för ráðherra og neitað að hlýða fyrirmælum lögreglu. Hún sagðist fagna því að lögreglan hafi haft frumkvæði að því að vísa atvikinu til nefndar um eftirlit með lögreglu. Þá svaraði Þórhildur:

„Ráðherra dómsmála á Íslandi, æðsti yfirmaður löggæslunnar á Íslandi, getur ekki leyft sér að hafa einhverja skoðun á því hvernig lýðræðið virkar og hvernig réttur fólks til að mótmæla virkar.“

Fréttin verður uppfærð