„Ég pantaði tvær ferðatöskur, í annarri fann ég fartölvu, þó án hleðslutækis og með lykilorði, en samt sem áður frábært! Ég er ánægður, góður díll að mínu mati,“ skrifar falsmenni á Facebook-síðuna Keflavíkurflugvöllur. Facebook hefur undanfarið dreift auglýsingum undir merkjum alþjóðaflugvallar Íslendinga með kostaboði fyrir landsmenn um að eignast farangur annars fólks.

Á síðunni eru boðnar til sölu ferðatöskur sem flugfarþegar eru sagðir hafa skilið eftir á flugvellinum og ekki sótt innan sex mánaða. Gefið er út að verðið á hverri tösku sé aðeins ein evra og samkvæmt frásögnum falsmenna undir færslu Keflavíkurflugvallar eru þar að finna myndavélar, fartölvur og merkjavörur sem flugfarþegar hafa ekki sótt. Kostaboðið er þó sýnd veiði en ekki gefin.

Facebook-síðan var stofnuð árið 2014 og gefur út að tæplega fjögur þúsund notendur hafi gefið henni að meðaltali 4,97 stjörnur. Jafnframt eru um 2.800 falskir fylgjendur að síðunni, sem eykur trúverðugleika hennar.

„Tilboðið er frábært, þetta er nú þegar þriðja ferðataskan sem ég panta. Í fyrstu tveimur voru margir hlutir, en verðmætasti hluturinn var Prada taska. Það verður spennandi að sjá hvort ég verði heppin(n) í þetta skipti,“ skrifar annað falsmenni. Þriðja falsmennið höfðar til góðmennsku. „Við pöntuðum nokkra ferðatöskur með eiginmanni mínum til að gefa til góðgerðarsamtaka. Fyrir okkur eru þetta ekki miklir peningar, en það mun gera einhvern annan hamingjusaman! Fólk, gerið góðverk!“

Þau falsmenni sem veita umsagnir undir færslum flugvallarins bera portúgölsk nöfn. Facebook-síðan Keflavíkurflugvöllur er með tengsl við aðila í Afríkuríkinu Mósambík, sem áður var portúgölsk nýlenda. Þegar haft er samband við síðuna er reynt að fá notendur til að skrá sig á vafasamri vefsíðu. Þar eru uppdiktaðar umsagnir Íslendinga um það mikla lán sem þeir hefðu orðið fyrir við að kaupa ferðatöskur annarra á aðeins eina evru stykkið. Enn sem komið er heldur Facebook áfram dreifingu auglýsinga frá falssíðunni. Ekki er þó vitað hvort einhverjir Íslendingar hafi gleypt beitu ódýrrar merkjavöru úr farangri annarra. Þegar rætt er við stjórnanda síðunnar hafnar hann því að um fals sé að ræða. „Nei, þetta er ekki svik. Við seljum á þessu verði vegna þess að vöruhúsin okkar eru yfirfull,“ fullyrðir hann.

Hjá Isavia fékk Heimildin þær upplýsingar að þetta sé í annað skiptið sem umrædd svikasíða fari í loftið, en fyrst gerðist að í nóvember síðastliðnum.

Isavia geti lítið gert í málinu þar sem fjölda tilkynninga þurfi til Facebook til þess að svikasíðan sé tekin niður.

Farangur sem skilinn er eftir á Keflavíkurflugvelli er ekki seldur. Guðjón Helgason, upplýsingafulltrúi Isavia, lýsir því í samtali við Heimildina hversu erfiðlega gengur að fá Facbook til þess að bregðast við svikasíðum. Hann segir fólk hafa verið í sambandi við Keflavíkurflugvöll um töskusöluna.