„Það komu tveir þreknir gaurar til mín á stofuna og voru nokkuð aggressívir. Þeir vildu að ég breytti vottorði sem ég hafði gefið mömmu annars þeirra,“ segir Árni Tómas Ragnarsson læknir sem varð fyrir árás á læknastofu sinni á þriðjudag.
„Hún hafði flúið til Spánar eftir að ég var hættur þar sem fíklamál eru frjálslegri. Hún bað mig um að skrifa vottorð um að hún hefði fengið dópið hjá mér og að ég bætti við að hún væri að taka þetta vegna gigtar og gamals fótbrots. Ég hafði sagt henni að ég myndi ekki staðfesta það heldur myndi ég bara skrifa að hún væri drug addict, sem er rétt,“ segir hann.
Árni Tómas hefur verið nokkuð í fréttum að undanförnu en í desember svipti landlæknis hann starfsleyfi að hluta, leyfinu til að ávísa verkjalyfjum, svefnlyfjum og kvíðalyfjum. Hann hefur síðustu tvö, þrjú árin ávísað morfínlyfjum til fíknisjúklinga sem nota vímuefni í æð, en upphaflega var það starfsfólk skaðaminnkunarúrræðisins Frú Ragnheiðar sem bað Árna Tómas um að skrifa upp á lyf fyrir skjólstæðinga sína.
„Þetta breytir engu með afstöðu mína til sprautufíkla, sem eru ágætisfólk að því er ég hef kynnst“
Hann segist aldrei hafa orðið fyrir ofbeldi í starfi, fyrr en nú. Sonur konunnar sem hafði verið skjólstæðingur hans, og var flutt til Spánar, hafi ekki verið sáttur við það þegar Árni Tómas neitaði að breyta vottorðinu, falsa vottorð.
„Þess vegna ruddust þeir inn til mín, nokkuð ógnandi, og heimtuðu nýtt vottorð, sem ég neitaði þeim um. Þeir urðu nokkuð æstir, einkum sonur konunnar, en ég neitaði stöðugt og vísaði þeim út. Þegar sá fyrri var við það að fara kom sá seinni og kýldi mig mjög föstu höggi fyrir bringspalirnar þannig að ég lá emjandi á gólfinu um hríð. Það sást síðan til þeirra hlaupa út Austurstræti. Ég komst heim með harmkvælum, en hef nú að mestu jafnað mig. Þetta er í fyrsta skipti sem fíklamál mín hafa endað með ofbeldi, líklega tveir handrukkarar,“ segir Árni Tómas, sem tilkynnti málið til lögreglu.
Honum var eðlilega brugðið við árásina en hann leggur áherslu á að þetta breyti engu um hans álit á fólki með fíknisjúkdóm. „Fíklarnir hafa alltaf verið prúðir og góðir. Þetta breytir engu með afstöðu mína til sprautufíkla, sem eru ágætisfólk að því er ég hef kynnst,“ segir hann.
Síðustu lyfseðlarnir þar sem Árni Tómas ávísaði morfínlyfjum, ópíóðum, runnu út 10. mars. Árásin átti sér stað 12. mars.
Árni Tómas er í persónulegu viðtali í nýjasta tölublaði Heimildarinnar. Viðtalið má lesa í heild sinni í blaðinu.
Athugasemdir