Með vatnsbirgðir til að ráða við einn „venjulegan húsbruna“

„Það horfir svo sem ágæt­lega við okkur,“ segir Einar Sveinn Jónsson, slökkvi­liðs­stjóri í Grinda­vík, spurður um hvernig honum lit­ist á að fyr­ir­tækjum í bænum sé heim­ilt að hefja starf­semi og Grind­vík­ingum að dvelja þar allan sól­ar­hring­inn.  „Við nátt­úr­lega sníðum okkur stakk eftir vexti.“ 

Hann seg­ist ekki eiga von á því að mik­ill fjöldi íbúa vilji gista í Grinda­vík við þær aðstæður sem uppi eru. Það er ekk­ert kalt vatn og þar af leið­andi ekki hægt að nota sal­erni og fleira. Það er lítið heitt vatn og því tak­mark­aður hiti á húsum. Margir séu búnir að koma sér ann­ars staðar fyrir til bráða­birgða eða lang­frama og flytja alla búslóð­ina sína í burtu. „Ég á ekki von á því að það verði gist í mörgum húsum í nótt. Þannig að okkar við­bún­aður mið­ast við það að tryggja öryggi þess­ara fáu sem eru í bænum.“

Slökkvi­liðs­stjór­innEinar Sveinn Jónsson.

Mynd: Skjáskot/RÚV

Einar Sveinn er nokkuð brattur en segir þó að það sé að sjálf­sögðu snúið að hanna við­bragð slökkvi­liðs við þær aðstæður sem uppi eru í Grinda­vík. „Þetta er snúið og krefj­andi,“ segir hann, „en við leysum það eins og önnur verk­efni sem við höfum tek­ist á við síð­ast­liðna mán­uði“.

Fjölmenn vakt er nú í bænum að sögn Einars en hingað til hefur lítið við­bragð verið til taks á nótt­unni enda eng­inn dvalið þar næt­ur­langt um hríð. TIl standi að auka við­veru slökkvi­liðs­ins eftir því hversu margir ákveða að snúa til baka og hver virknin verður, t.d. hjá fyr­ir­tækjum. 

Sam­ræm­ist þetta öllum reglum um bruna­varnir að heim­ild sé til dvalar allan sól­ar­hring­inn?

„Já, við munum að sjálf­sögðu tryggja það að við upp­fyllum allar reglur og lög, ann­ars værum við ekki að heim­ila íbúag­ist­ingu,“ svarar Einar. „Við erum að yfir­fara með Húsnæðis- og mann­virkja­stofnun allar áætl­anir út frá breyttum sviðs­myndum. Það eru breyt­ingar frá því sem var. Og við erum að sníða okkur stakk eftir vexti og end­ur­skoða allar áætl­anir og hvaða við­bragð þarf að vera. Þetta er í end­ur­skoðun og í dag erum við með full­trúa frá HMS í heim­sókn þar sem við erum að yfir­fara hvert við­bragðið þarf raun­veru­lega að vera miðað við mann­fjölda og umfang í bænum.“

Hann segir það sína skyldu sem slökkvi­liðs­stjóra að fólk sé öruggt í Grinda­vík út frá ákvæðum bruna­reglu­gerðar. „Og við erum búin að hugsa það út.“ Vatns­birgðir séu „klárar í húsi“ til að takast á við „venju­legan“ hús­bruna. „Öll stærstu fyr­ir­tækin sem eru að fara í gang eru við sjó þannig að við eigum búnað og lagnir til þess að leggja að þeim.“

Ertu með ráð eða við­vör­un­ar­orð fyrir fólk sem ætlar að vera þarna, hvort sem er yfir dag eða nótt?

„Það er bara að ganga hægt um gleð­innar dyr og bera virð­ingu fyrir öllu sem er í kring, bæði nátt­úru og umhverf­inu sem fólk er að ganga inn í,“ svarar Einar Sveinn. „Auðvitað getur í þessum hrær­ingum margt farið úrskeiðis. Raf­bún­aður laskast og vatns­kerfin. Það á nú að hleypa á kalda­vatns­kerfin á morgun og það þarf að vera vel vak­andi fyrir lekum svo að það verði ekki tjón af því.“

Bærinn að lifna við

Laust fyrir hádegi í dag þegar blaða­maður Heim­ild­ar­innar ræddi við Einar var fólk farið að koma til bæj­ar­ins. „það er svo­lítið af fólki komið til að kanna sín fyr­ir­tæki og kveikja ljós og koma sér aðeins á stað. Það er ánægju­legt að sjá að það er aðeins meira líf í bænum heldur en er búið að vera lengi.“ 

Góð til­finn­ing?

„Já, við erum búin að vera svo­lítið ein­mana i bænum síð­ast­liðnar vikur. Það er alltaf ánægju­legt að sjá fólk koma aftur.“

Einar Sveinn er Grind­vík­ingur og hefur sinnt vöktum líkt og kollegar hans í slökkvi­lið­inu í bænum allt frá 10. nóv­em­ber. „Þannig að við erum búin að standa lengi vakt­ina og reyna að halda þessu góðu.“

Spurður hvort hann sé ugg­andi yfir því að eitt­hvað komi upp á, s.s. miklir vatnslekar eða elds­voði, nú þegar líf er að fær­ast í bæinn svarar Einar Sveinn: „Ég er kannski ekki beint hræddur um það en að sjálf­sögðu, með auknum umsvifum eru meiri mögu­leikar á að það komi upp eitt­hvað frá­vik, að eitt­hvað komi upp á. En það er bara partur af þessu. Ef við ætlum að kveikja ljósin í Grinda­vík þá verðum við bara að kveikja. Það geta fylgt því frá­vik og við bara tök­umst á við það og erum að reyna að und­ir­búa okkur hvað við getum til þess að geta það.“

Verðið þið með vakt í nótt?

„Það verður ein­hver vakt í nótt. Það er ekki fast mótað. VIð verðum bara að sjá hvernig dag­ur­inn þró­ast. Fjöldinn og annað. Við spilum þetta að fingrum fram fram eftir degi.“

Ætlar þú að gista?

„Nei, nei, nei.“

Einn sjúkrabíll á dagvinnutíma

Bruna­varnir Suð­ur­nesja, sem eru með höf­uð­stöðvar sínar í Reykja­nesbæ, sjá um sjúkra­flutn­inga frá Grinda­vík og eru auk þess til­búnar til aðstoðar ef slökkvi­liðið í Grinda­vík óskar eftir því. Sigurður Skarp­héð­ins­son, vara­slökkvi­liðs­stjóri Bruna­varna Suð­ur­nesja, segir einn sjúkra­bíl alltaf til taks í Grinda­vík á dag­vinnu­tíma og til greina komi að hafa hann einnig á staðnum á nótt­unni nú þegar aðgangur að bænum, íbúð­ar­húsum og fyr­ir­tækjum, er orð­inn rúmur. „Auðvitað eru þetta hvorki góðar aðstæður né ákjós­an­legar,“ segir hann. Allt verði vissu­lega erf­ið­ara þegar ekki sé hægt að taka vatn með hefð­bundnum hætti. Hann seg­ist þó skilja full­vel að fólk vilji kom­ast heim til sín, þrátt fyrir að inn­viðir séu laskaðir. 

Aðgengi að Grínda­vík fyrir við­bragðs­að­ila er ekki jafn gott og áður. „Það er ekki hægt að neita því,“ segir Sigurður, enda flæddi hraun yfir Grinda­vík­ur­veg og því um lengri veg að fara fyrir slökkvi­bíla frá Reykja­nesbæ, verði aðstoðar þeirra óskað. Unnið er að úrbótum með hjá­leiðum hvað það varðar sem von­andi kom­ist í gagnið sem fyrst.