Sigríður Hrund Pétursdóttir, fyrrum formaður Félag kvenna í atvinnulífinu og fjárfestir, hefur tilkynnt framboð sitt til forseta Íslands. Framboðið tilkynnti Sigríður í fimmtugsafmæli sínu sem hún hélt á Kjarvalsstöðum seinni partinn í dag.

Sigríður er fyrsta konan til að bjóða sig fram til forseta í forsetakosningunum 2024. Í ræðu sinni í kvöld sagði Sigríður að „heilmargt hefur gerst á fimm áratugum. Jafnréttislögin voru sett 1976, Íslendingar tróna sem jafnréttis meistarar í alþjóða þorpinu 14 ár í röð en kynin þó hvergi nærri jöfn.“

„Við erum öll börn“

„Þorpið okkar Ísland er vinsælt og vel sótt og blandast hratt fjölbreytileika og fjölmenningu. Það er ríkidæmið okkar, það þarf þorp til að ala upp barn og við erum öll börn,“ sagði Sigríður.

Í ræðu sinni sagði Sigríður að ekki væri auðvelt að búa á Íslandi en að á Íslandi búi fólk sem þrái gott og öruggt líf. „Friður í hjörtum þýðir friður í heimi. Friður í fjölbreytni samfélags kallar á þolinmæði, þolgæði, þrautseigju og umburðarlyndi.“ Hún segir að á Íslandi heyrist allskonar útgáfur af íslensku. „Meira að segja ég tala með hreim“

Sigríður leggur ríka áherslu á kærleika í ræðu sinni og „að við æfum okkur í mennskunni og öllu hennar fjölbreytta litrófi.“ 

„Ég kem ekki fyrir valdið, ekki fyrir metorð eða hverfular vinsældir, ég á ekki pólitískt bakland og ég kem ekki einu sinni fyrir sjálfa mig, heldur fyrir okkur öll,“ sagði Sigríður. Hún segir að framboð sitt verði stórkostleg sköpunar vegferð umlukin krafti, samstöðu og gleði.

Hennar grunngildi segir hún að séu lýðræði, tjáningarfrelsi og jafnræði. Í ræðunni segir hún að hún tilkynni framboð sitt núna þar sem ekki er mikið um fyrirsjáanleika og stöðugleika á Íslandi. Henni þykir því skynsamlegt að skapa vissu og öryggi þegar kostur sé. 

Hún fagnar því að fleiri bjóði sig fram. „Hér mun mæta landslið frambjóðenda sem við fögnum, hvetjum og gefum rými til að vera og tjá sig, því þannig fáum við liðsheild og það besta út úr hverjum og einum liðsaðila.“