Gildi lífeyrissjóður mun ekki fella niður vexti og verðbætur á lánum sem Grindvíkingar eru með hjá sjóðnum með almennum hætti. Niðurstaða álitsgerðar lögmannsstofunnar LEX, sem unnin var fyrir Gildi, var afdráttarlaust sú að lífeyrissjóðum væri ekki heimilt að afskrifa vexti og verðbætur með almennum hætti hjá lántökum. Í tilkynningu sem birt var á vef hans í morgun segir að sjóðnum sé hins vegar „heimilt að taka til sérstakrar skoðunar einstaklingsbundnar aðstæður. Í því sambandi er bent á að lífeyrissjóðum er óheimilt að ráðstafa fjármunum í öðrum tilgangi en að greiða lífeyri.“
Þar segir enn fremur að Gildi muni meta stöðu einstakra lántakenda sjóðsins frá Grindavík og skoða sérstaklega hvernig hægt sé að koma til móts við þá sem höllum fæti standa út frá greiðslugetu og veðstöðu. „Staðan á svæðinu er enn um margt óljós og erfitt er að meta hvenær til slíkra aðgerða kemur. Þetta er niðurstaða stjórnar Gildis sem byggir meðal annars á álitsgerð LEX þar sem fjallað var um heimildir lífeyrissjóða til almennra niðurfellinga vegna náttúruhamfaranna í Grindavík. Minnt er á að sjóðurinn hefur þegar veitt lántakendum sex mánaða greiðsluskjól. Í því felst að gjalddögum er einfaldlega frestað þannig að lánið lengist um allt að sex mánuði. Frestunin hefur þar með nánast engin áhrif á mánaðarlegar greiðslur eftir að frystingu lýkur.“
Forsvarsmenn stéttarfélaga úr Grindavík hafa, ásamt formanni VR, staðið fyrir reglulegum mótmælum við skrifstofur Gildis undanfarið til að þrýsta á að sjóðurinn gefi eftir vexti og verðbætur sem safnast á íbúðalán Grindvíkinga, líkt og viðskiptabankarnir þrír: Landsbankinn, Íslandsbanki og Arion banki hafa þegar ákveðið að gera.
Síðustu mótmæli fóru fram á mánudag. Þar sagði ávarpaði Árni Guðmundsson, framkvæmdastjóri Gildis, mótmælendur og sagði að þetta væru „ekki stórar fjárhæðir fyrir sjóðinn“ og að hann væri að leita allra leiða til að hjá Grindvíkingum með sama hætti og bankarnir hefðu gert.
Einar Hannes Harðarson, formaður Sjómanna- og vélstjórafélags Grindavíkur, sagði við Heimildina af þessu tilefni að þetta væri í fyrsta sinn sem honum þætti Gildi sýna auðmýkt í málinu. „Þeir sjá það að við ætlum ekki að gefast upp. Við stöndum saman sem samfélag og munum ekki hætta fyrr en við fáum þessi mál á hreint.“
Einar sagði kröfuna skýra: hann vilji sjá það að lífeyrissjóðirnir geri nákvæmlega sama og bankarnir, felli niður vexti og verðbætur. Ef lífeyrissjóðirnir megi ekki bregðast við þegar náttúruhamfarir dynji yfir þá eigi þeir ekkert erindi á lánamarkað. Einar er sjálfur ekki með lán hjá Gildi en segir marga félagsmenn sína vera í þeirri stöðu. „Það er fullt af fólki sem á um mjög sárt að binda. Húsið þeirra er ónýtt og það á enn að borga af því, það fær ekki vexti og verðbætur niðurfelld. Ef þessi hús verða dæmd ónýt, og þú ert með lán hjá Gildi, þá er það að rýra eignarhlutinn um kannski einhverjar milljónir og greiðslur frá Náttúruhamfaratryggingu Íslands munu rýrna í kjölfarið. Þetta er galið.“
Lífeyrissjóðagjöldin er flöt og versta tegund af sköttum fyrir launafólk
Mér finnst það í raun, að enn einu sinni hafa komið í ljós að svo nefndir lífeyrissjóðir af Bandarískri fyrirmynd eru óhæfir eftirlaunasjóðir fyrir almenning.
Þetta hef ég reyndar alltaf sagt frá árinu 1969. þetta sjóðasukk var í algjörri andstöðu við stefnu ASÍ á þessum tíma er alltaf hefur gengið út á að mismuna eldra fólki.
Það var aldrei einhugur um þessi sjóðamál innan ASÍ þótt saga sú sem sjóðirnir sjálfir hafa látið skrifa um stofnun sjóðanna. Það var enn rifist um tilvist þeirra á formanna-fundi ASÍ 1975.