Félagið Víðarr ehf. fékk nýverið leyfi Orkustofnunar til fimm ára til leitar og rannsókna á málmum á svæði í og við Vatnsdalsfjall og Svínadalsfjall í Húnabyggð. Við rannsóknirnar verður lögð áhersla á að leita gulls, kopars, sinks, blýs, silfurs og annarra góðmálma. Aðstandendur félagsins, sem flestir eru útlendingar, segjast hafa langa reynslu af leit og vinnslu málma, meðal annars á Grænlandi og í Ástralíu. Samkvæmt áætlun þeirra mun leit og rannsóknir fela í sér jarðfræðikortlagningu, sýnatöku með hamri, jarðeðlisfræðilegar rannsóknir, grunnrannsóknir á umhverfisþáttum og kjarnaboranir. Það eru ekki síst síðastnefndu aðferðirnar sem vöktu spurningar landeigenda og fagstofnana sem gáfu umsagnir um leyfisumsóknina. Boranirnar munu fara fram með bor sem verður festur aftan á vörubíl eða flogið með þyrlu, að sögn framkvæmdaaðila. Borað verður djúpt, en þó líklega ekki meira en 250 metra. „Í versta falli gæti þurft að koma upp takmörkuðum aðgangsbrautum ef þær eru ekki þegar til staðar eða …