Félagsmanni í Sameyki sem starfað hefur í eldhúsi leikskóla í Reykjavík var nýverið sagt upp störfum í hagræðingaskyni. Ástæðan var sú að leikskólinn ákvað að fara þá leið að útvista þjónustunni til einkafyrirtækis í stað þess að vera með eigin fast starfsfólk. Frá þessu er greint í nýútkomnu tímariti Sameykis. 

Þar kemur fram að þegar haft var samband við mannauðs- og starfsumhverfissvið Reykjavíkurborgar og spurt hvort það væri stefna borgarinnar að einkavæða opinbera þjónustu, eða hvort um einstaka geðþóttaákvarðanir á vegum stjórnenda hafi verið að ræða, hafi borgin svarað því til að hún styðji hvorki einkavæðingu né útvistun á störfum. Hins vegar sé borgin ekki á móti því ef það kemur til að frumkvæði stjórnenda leikskólans. 

Orðrétt segir í svarinu: „Varðandi fyrirspurn stéttarfélagsins um hvort það sé stefna Reykjavíkurborgar að útvista störfum í eldhúsum í leikskólum borgarinnar er því til að svara að svo er ekki.“

Sú þróun hafi hins vegar átt sér stað að stjórnendur leik- og grunnskóla endurskipuleggi, í auknum mæli, rekstur sinn með þessum hætti. „Þar hefur verið horft til t.d. áhrifa á skipulag daglegs starfs, utanumhald af hálfu starfsstaðar hvað varðar mönnun vegna forfalla, pöntun aðfanga, lager fyrir matvöru og umsjón með réttri geymslu matvæla. Aðkeypt mötuneytisþjónusta felur einnig í sér þjónustu við samsetningu matseðla sem tekur mið af manneldismarkmiðum, matarstefnu og sérþörfum þegar við á, sem er oft á tíðum flókið utanumhald á starfsstöðum sviðsins.“

Í umfjöllun tímarits Sameykis segir að þegar Reykjavíkurborg hafi kallað til einkafyrirtæki sem rekið er með hagnaðarsjónarmið að leiðarljósi svo hægt sé að losna undan þeirri ábyrgð að reka eldhús í leikskóla í borginni hafi strax verið hafist handa við að segja upp starfsfólki. „Það þekkist vel að þegar opinber starfsemi er einkavædd þá hækkar verð á þjónustunni og gæði minnka, auk þess sem eftirlit með réttindum, kaupi og kjörum starfsfólks hverfur sökum þess að slík fyrirtæki ráða til sín verktaka eins og nú er í tísku að kalla „giggara“ og skrifað hefur verið áður um í tímarit Sameykis.“