Deleríum búbónis eftir bræðurna Jónas og Jón Múla Árnasyni er fyrir löngu orðinn samanofinn dægurmenningu þjóðarinnar. Gamanleikurinn var frumfluttur í Ríkisútvarpinu árið 1954, undir höfundanöfnunum Einbjörn og Tvíbjörn, og Leikfélag Reykjavíkur tók verkið til sýningar í ársbyrjun 1959. Sýningin sló rækilega í gegn og á næstu áratugum varð verkið eitt vinsælasta viðfangsefni áhugaleikhópa landsins. Þar léku lög eins „Söngur jólasveinanna“ og „Ágústkvöld“ stórt hlutverk, enda grípandi og glettin.

Leikurinn umhverfist um tilraunir athafnamannsins Ægis Ó. Ægis til að koma jólavarningi sínum í verslanir höfuðborgarinnar. Hann hefur lengi einokað markaðinn með aðstoð Jafnvægismálaráðherra ríkisstjórnarinnar en svo heppilega vill til að hann er mágur Ægis. Inn í málið blandast tilhugalíf ungra elskenda, nýr samkeppnisaðili á jólamarkaðinum, borgaralegar áhyggjur Pálínu, eiginkonu Ægis, og auðvitað djákninn á Myrká.

Bergur Þór Ingólfsson heldur um stjórnartaumana og skrifar aðlögun textans. Lögum úr öðrum leikverkum bræðrana hefur verið bætt við og handritinu breytt töluvert, þó grunnurinn sé …