Því fer fjarri að hægt sé að túlka sátt Íslandsbanka við fjármálaeftirlit Seðlabanka Íslands sem traustsyfirlýsingu á störf bankans, þrátt fyrir yfirlýsingar fyrrverandi bankastjóra Íslandsbanka, Birnu Einarsdóttur, þar um. Þetta segir Jón Guðni Ómarsson, sem tók við bankastjórastöðunni af Birnu.

„Ég held að það sé alveg augljóst að við gerðum mistök í því hvernig við brugðumst við sáttinni, bæði í upphafi og síðan við birtinguna. Þegar að þessi skýrsla kemur þá fær fólk visst áfall, og í staðinn fyrir að sýna auðmýkt þá fórum við í vörn. Eftir á að hyggja hefði verið klárlega betra að fara strax í sjálfsskoðun, átta sig á hvað gerðist, sýna auðmýkt í staðinn fyrir varnarviðbrögð,“ segir Jón Guðni í viðtali við Heimildina.

Ekki er hægt að hrósa viðbrögðum Íslandsbanka í kjölfar þess að sátt bankans vegna brota við útboðsferli á hlut ríkisins í bankanum var birt. Þannig liðu margir dagar liðu án þess að bankinn bæðist afsökunar á að hafa brotið af sér, brot sem voru það alvarleg að fjármálaeftirlitið sektaði bankann um tæplega 1,2 milljarða króna.

Spurður hvernig hafi staðið á því að ekki var betur staðið að málum, hvort stjórnendur Íslandsbanka hafi ekki hlotið að gera sér grein fyrir því hvers konar álitshnekki og traustsmissi bankinn gæti orðið fyrir, svarar Jón Guðni að hann sjálfur hafi ekki verið inni í undirbúningi að viðbrögðum vegna birtingu sáttarinnar. „Aftur, þá tel ég að það hafi verið varnarviðbrögð uppi frekar en að fólk hafi sýnt næga auðmýkt.“

Ef þú hefðir verið orðinn bankastjóri á þessum tíma, hefðir þú þá lagt þá línu að bankinn myndi einfaldlega biðjast auðmjúklega afsökunar á þeim brotum sem voru framin?

„Ég held að það sé ómögulegt fyrir mig að ætla að þykjast vera vitur eftir á og segja að ég hefði gert allt rétt. Það sem ég get gert er að bregðast við aðstæðum núna og eins og ég hef sagt áður þá finnst mér alveg klárt mál að við eigum að biðjast afsökunar á þessum brotum.“

Þannig að ef ég spyr þig hreint út: Biðst þú afsökunar á brotum bankans?

„Já, ég biðst afsökunar á þeim.“

En tekur þú undir það að sáttin sé á einhvern hátt traustsyfirlýsing við Íslandsbanka?

„Nei, ég get ekki sagt það.“