Ari Daníelsson, stjórnarmaður í Íslandsbanka, segir að það sé efnislega rangt að engin gögn séu til staðar um heimild sem regluvörður bankans hafi veitt honum til að taka þátt í útboði þar sem hlutur ríkisins í bankanum var seldur í mars í fyrra. Í tölvupósti til Heimildarinnar segir Ari að hann vilji árétta að hann fékk „skýra og afdráttarlausa heimild regluvarðar bankans fyrir þessum viðskiptum áður en þau fóru fram og við framkvæmd þeirra fylgdi ég leiðbeiningum regluvarðar í einu og öllu.“
Líkt og Heimildin greindi frá fyrr í dag var fjallað um viðskipti félags í eigu Ara í skýrslu fjármálaeftirlitsins um sátt vegna lögbrota sem Íslandsbanki framdi við sölumeðferðina á sjálfum sér, sem birt var í morgun. Í skýrslunni sagði Íslandsbanki það rétt að „engin skrifleg gögn séu til um beiðni hans um undanþágu frá banni eða jákvætt svar regluvarðar þess efnis. En hvort tveggja hafi verið gert munnlega og í vitna viðurvist og staðfest skriflega af regluverði, í tölvupóstsamskiptum að morgni næsta dags.“
Ari hefur sent Heimildinni afrit af þeim tölvupóstsamskiptum þar sem hann vísaði í gefna heimild og óskaði eftir staðfestingu þáverandi regluvarðar á næstu skrefum. Í tölvupóstinum leggur hann áherslu á mikilvægi þess að allt fari fram samkvæmt reglum bankans. „Hún svarar mér afdráttarlaust að svo sé og staðfestir að viðskiptin séu gerð með hennar samþykki.“ Í niðurlagi tölvupósts sem þáverandi regluvörður Íslandsbanka sendi Ara 23. mars í fyrra segir: „Allt í ordnung og samkvæmt bókinni :)“
Ari segir að í frumdrögum að sátt Íslandsbanka og Fjármálaeftirlits, sem barst um áramótin, hafi komið fram upplýsingar um þessi samskipti en að þau sé ekki að finna í lokaútgáfu sáttarinnar.
Fékk undanþágu munnlega á fræðslufundi
Í skýrslu fjármálaeftirlitsins, sem var birt í morgun, segir að Ari hafi fengið undanþáguna munnlega á fræðslufundi sem haldinn var fyrir nýja stjórnarmenn, eftir að yfirlögfræðingur Íslandsbanka kom inn á fundinn og tilkynnti um að útboðið væri hafið. Undanþágan var hins vegar ekki skráð fyrr en tveimur dögum síðar, eftir að útboðið var um garð gengið.
Í skýrslunni segir orðrétt: „Þegar útboðið hófst kl. 16:11 hafi staðið yfir fræðsla regluvarðar fyrir nýja stjórnarmenn. Á fræðslufundinum voru regluvörður, stjórnarformaður, umræddur stjórnarmaður og varamaður í stjórn. Yfirlögfræðingur málsaðila kom inn á fræðslufundinn til að upplýsa um að útboðið væri hafið. Varpaði umræddur stjórnarmaður m.a. fram þeirri spurningu hvort hann mætti sem stjórnarmaður taka þátt í útboðinu þó svo að lokað tímabil stæði yfir hjá málsaðila.“
Regluvörður hafi metið það sem svo að þar sem engar innherjaupplýsingar hefðu legið fyrir á þessum tíma væri hægt að beita undanþáguákvæði 5. kafla reglnanna enda slíkt ekki í ósamræmi við lög og reglur. „Reglugerð ESB nr. 596/2014 um markaðssvik (MAR) kveður einungis á um að viðskipti stjórnenda með bréf í útgefandanum séu óheimil í 30 daga fyrir birtingu uppgjörs, sbr. 11. tölul. 19. gr. reglugerðarinnar. Með vísan til þessa fékk stjórnarmaðurinn skýrt og afdráttarlaust svar regluvarðar þess efnis að honum væri heimilt að taka þátt í útboðinu og að frekari aðgerða væri ekki þörf.“
Í lokaskýrslu fjármálaeftirlitsins segir að því hafi ekki borist gögn sem staðfesta að send hafi verið skrifleg beiðni um undanþágu frá reglunum, þrátt fyrir beiðni þar um. „Ekki verður litið á umrætt samtal sem veitta undanþágu, enda gera reglur málsaðila ráð fyrir að beiðnir um undanþágu berist skriflega. [...] Forsendur til að taka ákvörðun um hvort starfsmönnum væri heimilt að taka þátt í útboðinu á grundvelli reglna málsaðila um ráðstafanir gegn hagsmunaárekstrum voru ekki til staðar vegna skorts á greiningu hagsmunaárekstra.“
Íslandsbanki viðurkenndi í andsvörum sínum til eftirlitsins að það hefði verið í betra samræmi við þær formkröfur sem gerðar eru í áðurnefndum reglum að skrá atburðarásina skriflega.
Ari er fyrrverandi starfsmaður Glitnis banka og og framkvæmdastjóri eignastýringafyrirtækisins Reviva Capital SA. Ari situr einnig í áhættu- og endurskoðunarnefnd Íslandsbanka. Félag í eigu Ara, sem skráð er í Lúxemborg, keypti fyrir tæpar 55 milljónir króna í útboðinu, en hann hafði komið inn í stjórn Íslandsbanka nokkrum dögum áður en útboðið fór fram.
Segðu þig ur stjorninni skilaðu hagnaðnum vertu öðrum
til fyrirmyndar.