Breska dagblaðið Financial Times hefur, eins og mörg önnur fjölmiðlafyrirtæki, farið af nokkrum krafti í framleiðslu eigin hlaðvarpsþátta á undanförnum misserum. Blaðið gefur út nokkra hlaðvarpsþætti með reglulegu millibili, m.a. um fjármál, stjórnmál og alþjóðamál sem hlýða má á, ókeypis, í öllum hlaðvarpsveitum. 

Gideon Rachman, sem í hátt í tvo áratugi hefur verið helsti álitsgjafi blaðsins um alþjóðamál, heldur til dæmis úti viðtalsþættinum Rachman Review þar sem hann á oft áhugaverð samtöl við leikendur og greinendur á sviði alþjóðastjórnmála.

En ég er ekki að skrifa þennan stutta pistil til að vegsama þann þátt, heldur fréttahlaðvarpið FT News Briefing, sem kemur út alla virka morgna, fyrir fótaferðartíma flestra Íslendinga.

Fyrir þau sem vilja byrja daginn á örskammti af áhugaverðri fréttaumfjöllun um viðskipti og alþjóðamál, hvort sem það er á leið til vinnu eða yfir morgunbollanum, má sannarlega mæla með þessu knappa hlaðvarpi. 

Í hefðbundnum þætti er farið yfir 3-4 fréttir úr Financial Times og rætt við blaðamennina um efni þeirra, í snörpum og skemmtilegum samtölum sem auðheyrilega eru vel undirbúin. Þættirnir eru alla jafna í umsjón bandaríska blaðamannsins Marc Filippino, sem hefur einkar áheyrilega rödd.

Að jafnaði eru þættirnir um níu mínútna langir og það er eiginlega hálfgert afrek hvað Filippino og félögum hjá Financial Times tekst að koma miklu af áhugaverðum upplýsingum, oft um fréttamál sem fá litla athygli íslenskra fjölmiðla, inn í eyrun á manni á þessari stuttu stund.