Fyrri aukaspurning:

Á skjáskotinu hér að ofan má sjá leikkonu fara með hlutverk í sjónvarpsþætti. Hvað heitir annaðhvort leikkonan eða persónan? Í tilfelli persónunnar dugar fornafn hennar.

***

Aðalspurningar:

1.  Hvernig dýr er Sonic?

2.  Hvaða kunni íslenski rithöfundur fæddist á þessum degi árið 1902?

3.  Hvað heitir prinsessan í myndunum um Shrek?

4.   Árið 1535 var franski landkönnuðurinn Jacques Cartier á ferð á mjög fjarlægum slóðum. Hann hitti tvo unga menn af ættum frumbyggja og bað þá að vísa sér veg. Þeir bentu honum þá á leiðina til [XXX] og orðið sem þeir nefndu þýddi einfaldlega „þorp“. Cartier og menn hans héldu hins vegar að ungu mennirnir ættu við nafn alls landsins. Landið hefur síðan verið kallað þessu nafni, og heitir ... hvað?

5.   Hvar er bandaríska herstöðin sem fyrrum var kölluð Thule?

6.  Í hvaða landi er tískuhúsið Prada upprunnið?

7.  Hverjir voru Ásbirningar?

8.  Hversu gömul er Jörðin talin vera?  14,5 milljarða ára? — 10,5 milljarða ára? — 4,5 milljarða ára? — 1,5 milljarða ára? — 6.500 ára?

9.  Hver samdi og söng hið vinsæla dægurlag Don't Try to Fool me?

10.  Á hvaða hljóðfæri spilaði Bítillinn George Harrison fyrst og fremst?

***

Seinni aukaspurning:

Á myndinni hér að neðan má sjá Mada 9, tilraunaeintak af rándýrum sportbíl sem hugsanlega verður settur í fjöldaframleiðslu á næstunni. Bíllinn er búinn japanskri vél en er að öðru leyti framleiddur í landi sem er ekki beint þekkt fyrir bílaframleiðslu, og allra síst fyrir framleiðslu á lúxussportbílum. Þó ekki væri annað, þá er vegakerfi þessa hrjáða lands varla sniðið fyrir lága lúxusbíla. Hvaða land framleiðir Mada 9?

***

Svör við aðalspurningum:

1.  Broddgöltur.

2.  Halldór Laxness.

3.  Fíóna.

4.  Kanada.

5.  Á Grænlandi.

6.  Ítalíu.

7.  Höfðingjaætt á Sturlungaöld. Nákvæmara þarf svarið ekki að vera.

8.  4,5 milljarða ára.

9.  Jóhann G. Jóhannsson.

10.  Gítar.

***

Svör við aukaspurningum:

Á efri myndinni er Lisa Kudrow að leika persónuna Phoebe í sjónvarpsþáttunum Friends.

Sportbíllinn á neðri myndinni er framleiddur í Afganistan.