Aðildarfélög BSRB hafa náð samkomulagi um launahækkanir og kjarabætur fyrir starfsfólk í almannaþjónustu við ríki og Reykjavíkurborg. Um skammtímasamninga er að ræða sem gilda í tólf mánuði frá 1. apríl 2023. Frá þessu segir í tilkynningu frá BSRB.

Um fjórtán þúsund félagsmenn eru í þeim fjórtán aðildarfélögum BSRB sem eru við það að skrifa undir þessa skammtímasamninga. Stærsta félagið, Sameyki, hefur þegar undirritað nýja samning.

Í kjölfar undirritunar félaganna fara samningarnir í kynningu og svo til atkvæðagreiðslu hjá, sem ljúka mun 14. apríl.

Fagnaðarefni að samningur taki við af samningi

Í tilkynningu frá BSRB er haft eftir Sonju Ýr Þorbergsdóttur formanni BSRB að leiðarljósið samninganefndar BSRB hefði verið að verja kaupmátt starfsfólks í almannaþjónustu, enda væri verðbólga farin að bíta almenning verulega.

„Við fögnum því að kjarasamningur taki við af kjarasamningi svo launafólk fái ávinninginn af samningunum strax í vasann 1. maí. Rétt eins og á almenna markaðinum er um skammtímasamninga að ræða og svo hefst fljótlega undirbúningur fyrir gerð langtímakjarasamninga hjá aðildarfélögum BSRB. Kröfur okkar munu ekki eingöngu beinast að launagreiðendum heldur einnig stjórnvöldum,“ er haft eftir Sonju Ýr.

Stéttarfélögin sem samkomulagið nær til eru eftirfarandi:  Félag flugmálastarfsmanna ríkisins, Félag opinberra starfsmanna á Austurlandi, FOSS - stéttafélag í almannaþjónustu, Félag starfsmanna stjórnarráðsins, Kjölur, stéttarfélag starfsmanna í almannaþjónustu, Landssamband lögreglumanna, Landssamband slökkviliðs- og sjúkraflutningamanna, Sameyki - stéttarfélag í almannaþjónustu, Sjúkraliðafélag Íslands, Starfsmannafélag Garðabæjar, Starfsmannafélag Kópavogs, Starfsmannafélag Húsavíkur, Starfsmannafélag Suðurnesja og Starfsmannafélag Vestmannaeyja.