Ný stjórn Samtaka fyrirtækja í sjávarútvegi (SFS) var kjörin á aðalfundi samtakanna í dag. Auk formannsins, Ólafs Marteinssonar, eru nítján manns í stjórninni. Vísir greinir frá. 

Þrjár konur bættust við í hóp stjórnarmanna en Anna Guðmundsdóttir, fjármálastjóri Gjögurs hf., Katrín Pétursdóttir, forstjóri Lýsis hf. og Linda Gunnlaugsdóttir, forstjóri Bacco Seaproducts ehf. eru þær konur sem komnar eru í stjórnina. 

Anna Guðmundsdóttir, Katrín Pétursdóttir og Linda Gunnlaugsdóttir eru komnar í stjórn SFS.

Mynd: Samsett mynd

Klemens Hjartar, meðeigandi hjá McKinsey & Co, sagði á ársfundi SFS í fyrra að kynjahallinn í stjórn sjávarútvegs myndi koma í bakið á greininni. 

„Þetta er algjör­lega for­kast­an­legt“

Kjarninn greindi frá því í fyrra að Klem­ens hefði í erindi sem hann hélt á árs­fundi SFS gagnrýnt samtökin fyrir að engin kona væri í stjórn. 

„Það sló mig svo­lítið þegar ég kom hérna í dag og frétti að nú væri komin ný stjórn SFS. Það er 19 manna stjórn og þar eru núll konur í stjórn­inni. Iðn­aður sem ætlar að halla sér fram og breyta heim­in­um, búa til aðgrein­an­leika, getur ekki hagað sér svo­leið­is. Þetta er algjör­lega for­kast­an­legt og það liggur mér á hjarta, af því að nú vinn ég við að ráð­gefa fyr­ir­tækjum út um allan heim, þetta er ekki hægt. Þetta á eftir að koma í bakið á ykk­ur,“ sagði hann. 

Klem­ens sagð­ist vona að atvinnu­greinin fari að skilja að þetta gangi virki­lega ekki. „Ef þetta gerð­ist ein­hvers staðar ann­ars staðar í venju­legu fyr­ir­tæki sem er með þennan metnað sem hægt er að hafa hér, þá væri það bara alls ekki ásætt­an­leg­t.“