Edda Falak hefur hafið störf á ritstjórn Heimildarinnar, þar sem hún mun stýra þáttum um samfélagsmál, auk annarra verkefna. 

Edda er með meistaragráðu í fjármálum og stefnumótandi stjórnun frá Copenhagen Business School. Við heimkomuna árið 2020 hóf hún útgáfu þáttanna Eigin konur, þar sem hún hefur veitt þolendum ofbeldis rödd, rými og vettvang til að tjá reynslu sína. Alls liggja eftir Eddu 117 þættir, þar sem fjöldi fólks hefur valið að treysta henni fyrir frásögnum af erfiðleikum. Sumar þessara frásagna hafa haft afgerandi áhrif á samfélagsumræðuna. Eigin konur hóf samstarf við Stundina árið 2022 um birtingu þáttanna, ritstjórnarlega ráðgjöf og samvinnu varðandi einstök mál. 

Þættir Eddu Falak

Á Heimildinni mun Edda halda áfram að fjalla um margvíslegar birtingarmyndir ofbeldis og áhrif þess á þolendur og samfélagið, auk þess að sinna öðrum verkefnum. Þættir undir hennar stjórn koma áfram út í nýrri mynd undir merkjum Heimildarinnar. 

„Ég mun halda áfram að sinna þessum málaflokki af krafti á nýjum stað,“ segir Edda. Hún hafi verið að takast á við erfið mál og það hafi verið þungt að bera það ein. „Fyrir mig er mikils virði að vera orðin hluti af ritstjórn Heimildarinnar, þar sem ég fæ tækifæri til að fjalla um mál í víðara samhengi en áður. Ég er mjög spennt fyrir komandi tímum.“ 

Ingibjörg Dögg Kjartansdóttir, annar ritstjóra Heimildarinnar, segir að samstarf Eigin kvenna og Stundarinnar hafi gengið vel. „Edda hefur sýnt að hún er óhrædd við að takast á við krefjandi verkefni og fólk treystir henni fyrir sér. Nú þegar Edda er orðin hluti af ritstjórn Heimildarinnar munum við byggja á þeim grunni og leggja enn meira í þætti undir hennar stjórn.“ 

Þórður Snær Júlíusson, hinn ritstjóri Heimildarinnar, segir það fagnaðarefni að fá Eddu til liðs við ritstjórn miðilsins. „Í nýjum þáttum, með stuðningi sterkrar ritstjórnar Heimildarinnar, gefst tækifæri til að nálgast þau mikilvægu viðfangsefni sem Edda hefur sérhæft sig í að fjalla á breiðari grunni og á hefðbundnara fjölmiðlaformi.“

Fyrstu þættir fara í loftið í mars 

Þættir undir stjórn Eddu Falak hefja göngu sína í mars. Í þáttunum verður haldið áfram að gefa þeim rödd sem þurfa á henni að halda og leiða fram sjónarmið þeirra, ásamt því að kalla eftir skýringum frá þeim sem bera samfélagslega ábyrgð í hverju tilfelli fyrir sig.

Áskrifendur Heimildarinnar hafa aðgengi að þáttunum á vefsíðu miðilsins. Áskrift að Heimildinni fæst hér. Eins er hægt að kaupa sérstaka áskrift sem veitir aðgengi að þáttum Eddu Falak. Slík áskrift kostar 1.390 krónur á mánuði og fæst hér. Engin greiðsla á sér stað fyrr en í apríl.