Fyrri aukaspurning:

Af hvaða tegund var flugvélin sem þarna er orðin flak eitt?

***

Aðalspurningar:

1.  Íslenska hljómsveitin Sycamore Tree hefur starfað í mörg ár en ekki alltaf verið áberandi. Þetta er í raun dúet og nýtur nú vinsælda fyrir lagið How Does It Feel? Söngkona hljómsveitarinnar er ekki síður kunn fyrir leik en söng. Þó var frami hennar kannski mestur er hún lék söngkonu. Hún heitir ... hvað?

2.  Hinn partur dúetsins er hins vegar þekktur fatahönnuður auk þess að vera tónlistarmaður. Hann hefur og barist fyrir hag heimilislausra. Hann heitir ... hvað?

3.  Í hvaða landi er orrustuvöllurinn Waterloo?

4.  Hvaða hershöfðingi telst vera sigurvegari í orrustunni við Waterloo?

5.  Úkraínumenn hafa óskað eftir því að fá bandarískar orrustuþotur sér til hjálpar gegn innrás Rússa. Því hefur verið heldur treglega tekið af Bandaríkjamönnum en hvað kallast þessar þotur?

6.  Paavo Nurmi var ótrúlegur íþróttamaður á þriðja áratug 20. aldar. Hann setti þá 22 heimsmet og vann 9 gullverðlaun á ólympíuleikum. Í hverju keppti Nurmi? Hér þarf svarið að vera þokkalega návæmt.

7.  Frá hvaða landi var Nurmi?

8.  Í hvaða fljóti er Dettifoss?

9.  Til er á latínu bók, annaðhvort frá fyrstu eða fimmtu öld eftir Krist, og er Apicius nokkur sagður höfundur hennar. Fátt er varðveitt af svo gömlum bókum af þessu tagi, en bókin nefnist De re culinaria. Hvernig bók er þetta?

10.  Yupik, Kerasan, Zuni, Oodham, Ojibwe og Hopi eru allt tungumál sem töluð eru í einu og sama ríkinu, þótt vissulega séu þau ekki útbreiddustu málin í því ríki. Hvaða ríki er það?

***

Seinni aukaspurning:

Hver er sú hin hláturmilda kona?

***

Svör við aðalspurningum:

1.  Ágústa Eva.

2.  Gunnar Hilmarsson eða einfaldlega Gunni Hilmars.

3.  Belgíu.

4.  Wellington. Blücher kom og við sögu en Wellington telst hafa verið honum æðri.

5.  F-16. Þær ku nefndar Fighting Falcon en óþarfi er að vita það.

6.  Millivegalengda- og/eða langhlaupari. Hann hljóp í rauninni varla nokkurn tíma heilt maraþon-haup og fékk ekki verðlaun fyrir slíkt svo „maraþon-hlaup“ dæmist ekki rétt svar. Og „hlaup“ duga ekki. Þið fáið hins vegar rétt fyrir hvorttveggja — „millivegalengdir“ og „langhlaup“.

7.  Finnlandi.

8.  Jökulsá á fjöllum.

9.  Matreiðslubók.

10.  Bandaríkin. Þetta eru nokkur af tungumálum innfæddra (Indíána).

***

Svör við aukaspurningum:

Á efri myndinni er flakið af DC-3 vélinni á Sólheimasangi. Eric Cheng tók myndina með dróna.

Á neðri myndinni hlær leikkonan Jennifer Aniston.