Sigurður Gísli Bond Snorrason, knattspyrnumaður sem lék með Aftureldingu í næst efstu deild Íslandsmótsins í fyrra, hefur verið úrskurðaður níu og hálfs mánaðar langt bann frá allri þátttöku í knattspyrnu, eða frá 1. febrúar til 15. nóvember.
Úrskurður aga- og úrskurðarnefndar KSÍ hefur verið birtur á vef sambandsins, en hann var kveðinn upp fyrr í dag.
Heimildin sagði frá því fyrir skemmstu að framkvæmdastjóri KSÍ hefði vísað máli Sigurðar Gísla til nefndarinnar, en um er að ræða fordæmalaust mál í íslenskum fótbolta og komst einungis upp af því að erlend veðmálavefsíða, Pinnacle, sendi KSÍ upplýsingar um að leikmaðurinn hefði veðjað á hundruð knattspyrnuleikja á Íslandi á um þriggja mánaða tímabili síðasta sumar.
Á meðal þeirra leikja sem Sigurður Gísli veðjaði á voru fimm leikir með hans eigin liði, þar af fjórir sem hann tók sjálfur þátt í. Tekið skal fram að leikmaðurinn veðjaði aldrei gegn sínu eigin liði og engin merki eru um að hann hafi reynt að hagræða úrslitum. Sjálfur tjáði hann sig um málið í hlaðvarpsþættinum Dr. Football á dögunum og sagðist aldrei hafa stigið inn á knattspyrnuvöll með annað í huga en það að gera sitt besta fyrir sitt lið.
Brot á grundvallarreglu
Í úrskurðinum segir að við ákvörðun viðurlaga hafi verið horft til þess að Sigurður „hafi gerst brotlegur gagnvart ákvæði laga KSÍ sem er ætlað til að standa vörð um heilindi og háttvísi í knattspyrnuhreyfingunni“ og að þegar leikmaður gerist uppvís af þátttöku í veðmálastarfsemi í tengslum við eigin leiki og eigið mót gangi það „gegn grundvallarreglu um heiðarlegan leik gagnvart öllum þátttakendum leiksins“. Aganefndin segir einnig að um sé að ræða „brot á grundvallarreglu“ sem sé „alvarlegs eðlis, sér í lagi með tilliti til þess að veðmálin lutu að leikjum sem varnaraðili tók sjálfur þátt í.“
Sigurður Gísli fór fram á að málinu yrði vísað frá og vísaði í þeim efnum meðal annars til vanreifunar þess í greinargerð KSÍ og formgalla á framsetningu málsins til aganefndar. Aganefndin féllst ekki á þær kröfur, en tók þó undir sjónarmið sem Sigurður Gísli setti fram um að einungis bæri að gera honum refsingu fyrir að hafa veðjað á leiki eigin liðs og í eigin móti.
Í greinargerð Klöru Bjartmarz framkvæmdastjóra KSÍ til aga- og úrskurðarnefndar var vísað til þess að samkvæmt staðalsamningi KSÍ, stöðluðum leikmannasamningi á milli leikmanns og félags, en samning af því tagi hafði Sigurður ritað undir við Aftureldingu, væri óheimilt að veðja á leiki í íslenskum fótbolta yfir höfuð.
Aga- og úrskurðarnefnd taldi hins vegar rétt að fallast á það með Sigurði Gísla að byggja ekki á því ákvæði staðalsamningsins, enda væri „KSÍ ekki aðili að staðalsamningi sem gerður hafi verið á milli varnaraðila og knattspyrnudeildar Aftureldingar“.
Samkvæmt úrskurðinum hefur leikmaðurinn, sem er um þessar mundir skráður í knattspyrnuliðið KFK, þrjá daga til að áfrýja niðurstöðu aganefndarinnar. Á vef Fótbolta.net kemur fram að það hyggist hann gera.
Athugasemdir