Efling mun hefja undirbúning verkfallsaðgerða hafni Samtök atvinnulífsins tilboði stéttarfélagsins sem nú hefur verið lagt fram sem grundvelli áframhaldandi viðræðna. Tilboð Eflingar gildir til hádegis á morgun, þriðjudag.

Tilboð Eflingar hljóðar upp á kjarasamning til fimmtán mánaða, sem tæki gildi frá 1. nóvember síðastliðnum, og gilti til loka janúar 2024. Í forsendum samningstilboðsins er tilgreint að taxtalaun skuli hækka nægjanlega til að ná til baka kaupmáttarrýrnun frá síðustu launahækkun, frá því í apríl síðastliðnum, og jafnframt að kaupmáttur þeirra verði tryggður miðað við núverandi og væntanlega verðbólgu á samningstímanum.

Þá inniber samningstilboðið að taka skuli tillit til þess að húsnæðiskostnaður á samningssvæði Eflingar, sem einkum er höfuðborgarsvæðið, sé hár og hærri en á landsbyggðinni. Þannig segir að leigukostnaður sé 45 prósent hærri þar en á landsbyggðinni. Einnig eru settar fram þær forsendur að taka þurfi tillit til þess að munur sé á samsetningu félagahóps Eflingar og félagahópum stéttarfélaga á landsbyggðinni, meðal annars sé skipting milli atvinnugreina önnur og starfsaldur hjá sama fyrirtæki allt annar. Í tilboði Eflingar segir þá enn fremur að sérstök framfærsluuppbót að upphæð 15 þúsund krónur skuli bætast ofan á öll laun, en standi utan við grunnlaun, vegna hærri framfærslukostnaðar fólks á samningssvæði stéttarfélagsins.

Taxtahækkanir grunnlauna að krónutölu verða lægst 40 þúsund krónur og mest rúmar 64 þúsund krónur miðað við tilboðið og er það sagt innan þess ramma sem samið hefur verið um við aðra hópa. Þá eiga grunnlaun þeirra sem ekki taka laun eftir kauptöxtum að hækka um 33 þúsund krónur.

Segir ferlið hafa verið kostulegt

Í tilkynningu sem send var með samningstilboðinu segir að með því sé komið verulega á móts við Samtök atvinnulífsins, bæði frá upphaflegri kröfugerð sem og fyrri tilboðum í nóvember og í desember. Hins vegar er því með öllu hafnað af samninganefnd Eflingar að stéttarfélagið sé bundið af kjarasamningagerð annarra stéttarfélaga og yfirlýsingar Samtaka atvinnulífsins þar um séu í algjörri andstöðu við lagaramma íslensks vinnumarkaðar. Gefur samninganefndin sér að ríkissáttasemjari muni beita sér eins og þurfa þykir til að aðilar virði lögvarinn og sjálfstæðan samningsrétt hvors annars.

„Haldi Samtök atvinnulífsins áfram að hafna því að tekið sé tillit til augljósra staðreynda um aðstæður verkafólks á Höfuðborgarsvæðinu og lítilsvirða sjálfstæðan samningsrétt þeirra mun félagið lýsa viðræður árangurslausar og hefja undirbúning verkfallsaðgerða,“ segir í tilkynningu stéttarfélagsins.

Tilboði Eflingar var skilað inn í gærkvöldi. Sólveig Anna Jónsdóttir, formaður Eflingar, segir að enn hafi ekki borist viðbrögð við því. Henni þyki þó líklegt að ríkissáttasemjari boði til fundar áður en samningstilboðið rennur út.

Spurð hvort hún sé bjartsýn á að Samtök atvinnulífsins taki jákvætt í tilboðið, byggt á þeim fundum sem Efling hefur þegar átt við viðsemjendur sína, segir Sólveig Anna að ferlið til þessa hafi verið fremur kostulegt. Efling hafi sýnt mikil faglegheit í viðræðunum til þessa, verið fljót að bregðast við og tekið tillit til sjónarmiða Samtaka atvinnulífsins. „Við höfum hins vegar aldrei fengið neitt til baka. Þau hafa sýnt ótrúlega þvermóðsku í viðræðunum. Það hefur raunverulega ekki verið viðurkennt af Samtökum atvinnulífsins að Efling hafi sjálfstæðan samningsrétt. Það hefur ekki verið viðurkennt að þetta sé lýðræðislegt og lögvarið ferli á Íslandi, sem menn verði að sætta sig við að vinna eftir.“

Segir sjálfstæðan samningsrétt Eflingar ekki virtan

Sólveig bendir á að Efling sé lang stærsta einstaka félag verkafólks á landinu, verið sé að semja fyrir 21 þúsund félaga. „Það ætti auðvitað að segja sig sjálft að okkar sjálfstæði samningsréttur sé virtur, en það hefur ekki verið. Við höfum verið beitt hótunum, okkur hafa verið settir afarkostir,“ segir Sólveig og vísar þar til yfirlýsinga um að ekki sé hægt að semja við Eflingu um meiri kjarabætur en þegar hefur verið samið um við önnur stéttarfélög.

Efling hefur sætt gagnrýni fyrir að hafa haldið því á lofti að framfærslukostnaður sé hærri á höfuðborgarsvæðinu en á landsbyggðinni. Sólveig Anna segir að Efling byggi þann málflutning sinn á opinberum gögnum og gögnum sem safnað hafi verið innan stéttarfélagsins. „Við byggjum á opinberum gögnum sem sýna fram á að framfærslukostnaður á höfuðborgarsvæðinu er hærri. Það er auðvitað leiðinlegt að sjá menn fara í einhverja tilraun til að stilla þessu upp sem því að Efling sé að ráðast gegn hagsmunum annarra. Auðvitað erum við ekki að því. Okkur ber einfaldlega skylda til að starfa fyrir okkar félagsfólk og þegar þetta er ljóst, með opinberum gögnum, getum við ekki annað gert. Það er því ansi langt gengið hjá öðrum, þá formönnum innan Starfsgreinasambandsins, að láta eins og við séum þarna að fremja einhvern glæp. Ég veit eiginlega ekki hvað hægt er að segja um þann málflutning, hann er svo ótrúlega langsóttur og móðursýkislegur.“