Flestir landsmenn treysta Ásmundi Einari Daðasyni, mennta- og barnamálráðherra, af ráðherrum ríkisstjórnarinnar. Sömuleiðis bera fæstir vantraust í hans garð. Minnst traust bera landsmenn til Bjarna Benediktssonar, fjármála- og efnahagsráðherra, og Jóns Gunnarssonar dómsmálaráðherra.
Þetta eru niðurstöður nýrrar könnunnar rannsóknafyrirtækisins Maskínu á trausti til ráðherra ríkisstjórnarinnar. Samkvæmt könnuninni ber Ásmundur Einar höfuð og herðar yfir samráðherra sína. Er það einkum vegna þess hversu fáir vantreysta Ásmundi en aðeins 26,4 prósent aðspurðra bera lítið traust til hans á meðan að 46,3 prósent bera mikið traust til Ásmundar.
Katrín Jakobsdóttir forsætisráðherra er sá ráðherra sem nýtur næstmests trausts en 43,2 prósent aðspurðra bera mikið traust til hennar. Hins vegar segjast 37 prósent þátttakenda bera lítið traust til forsætisráðherrans. Fjórum ráðherrum vantreystir almenningur síður en Katrínu, en ráðherrarnir eru tólf talsins.
Í næstu sætum yfir þá ráðherra sem mest traust er borið til eru þau Willum Þór Þórsson heilbrigðisráðherra, Þórdís Kolbrún Reykfjörð Gylfadóttir utanríkisráðherra og Guðlaugur Þór Þórðarson, umhverfis-, orku og loftslagsráðherra, í þessari röð. Þau eru sömuleiðis í sætum tvö til fjögur yfir þá ráðherra sem landsmenn bera minnst vantraust til.
Þó Bjarni Benediktsson sé sá ráðherra sem flestir vantreysta, alls 61,5 prósent aðspurðra, er hann þó ekki neðstur á listanum yfir þá ráðherra sem fólk ber mikið traust til. Alls segjast 23,2 prósent þeirra sem tóku þátt í könnunin bera mikið traust til Bjarna. Fæstir bera hins vegar mikið traust til Lilju Daggar Alfreðsdóttur, menningar- og viðskiptaráðherra, eða 18,8 prósent þeirra sem afstöðu tóku. Þá sögðust 50,5 prósent bera lítið traust til Lilju, sem setur hana í þriðja sæti yfir þá ráðherra sem fólk vantreysta helst, á eftir Bjarna og Jóni Gunnarssyni.
Traust vex á öllum ráðherrum Sjálfstæðisflokksins
Nokkrar breytingar hafa orðið á trausti til ráðherra miðað við síðustu mælingu Maskínu sem var framkvæmd í apríl síðastliðnum. Ber þá helst að nefna að þeir sem svara því til að þeir beri mikið traust til Lilju voru þá 33 prósent en eru tæp 19 prósent nú, sem fyrr segir. Svandís Svavarsdóttir matvælaráðherra hefur líka misst traust fólks en í apríl sögðu 31 prósent aðspurðra að þeir bæru til hennar mikið traust. Það hlutfall er 22 prósent nú.
Allir ráðherrar Sjálfstæðisflokksins hafa aukið við sig hlutfall þeirra sem treysta þeim vel á meðan að traustið hefur dalað í garð ráðherra Vinstri grænna og Framsóknarflokksins. Fimm prósentustigum fleiri segjast nú treysta Bjarna Benediktssyni vel, sem dæmi, og níu prósentustigum fleiri bera nú mikið traust til Áslaugar Örnu Sigurbjörnsdóttur, háskóla-, iðnaðar og nýsköpunarráðherra, heldur en í apríl síðastliðnum.
Þegar horft er á muninn á þeim sem svara því til að þeir beri lítið traust til ráðherra milli kannanna tveggja má sjá að þeim fækkar um níu prósentustig sem bera lítið traust til Bjarna og um átta prósentustig sem bera lítið traust til Áslaugar Örnu. Hins vegar fjölgar þeim um 16 prósentustig sem bera lítið traust til Lilju, um tíu prósentustig sem bera lítið traust til Svandísar og um átta prósentustig sem bera lítið traust til Ásmundar Einars.
Athugasemdir