Fjölmiðla- og fjarskiptafyrirtækið Sýn hefur gert samkomulag um sölu á stofnneti sínu til Ljósleiðarans. Þetta kemur fram í tilkynningu til Kauphallarinnar, þar sem bréf í Sýn ganga kaupum og sölum.

Kaupverðið sem samið var um er 3 milljarðar króna, og vænta stjórnendur Sýnar þess að hagnast um 2 milljarða króna á viðskiptunum. Kaupandinn, Ljósleiðarinn, er dótturfyrirtæki Orkuveitu Reykjavíkur, sem er í eigu Reykjavíkurborgar, Akraneskaupstaðar og Borgarbyggðar. Í raun eru það því sveitarfélög að kaupa stofnnet Sýnar. 

Sýn ætlar að leigja þjónustu Ljósleiðarans til tíu ára. 

Enn er málið þó ekki frágengið því enn á eftir að fara fram áreiðanleikakönnun og ganga frá fjármögnun kaupanna. Þá á Samkeppniseftirlitið líka eftir að leggja blessun sína yfir viðskiptin. 

Skammt er síðan Sýn seldi óvirka innviði og í samskonar viðskiptum um sölu og endurleigu eigna fyrirtækisins. Samningur um kaupin var gerður 1. apríl á síðasta ári og samþykktur í nóvember síðastliðnum. Bandaríska sjóðsstýringafélagið Digital Bridge Group Inc. keypti þessa óvirku innviði og greiddi um sex milljarða króna fyrir. 

Hagnaði þeirrar sölu hefur síðan verið ráðstafað til hluthafa Sýnar í gegnum kaup fyrirtækisins á eigin bréfum. Stjórn fyrirtækisins ákvað á síðasta ári að kaupa allt að 9,9 prósenta hlut í Sýn fyrir að hámarki 2 milljarða króna. Hluti hagnaðarins fór líka í að greiða niður tveggja milljarða króna skuld við Landsbankann.

Ekkert kemur fram í Kauphallartilkynningunni vegna sölu stofnnetsins hvernig hagnaðinum verði ráðstafað. Upplýsingar um það verða gefnar þegar endanlegir samningar liggja fyrir. Stefnt er að því að það verði fyrir 15. desember.