Fyrri aukaspurning:

Þetta plakat J. Howard Miller fór víst ekki sérlega víða á sínum tíma en hefur eftir á orðið vinsælt tákn um ... hvað?

***

Aðalspurningar:

1.  Hver skrifaði bók sem heitir í íslenskri þýðingu Veröld sem var?

2.  Sami höfundur skrifaði fræga smásögu um afreksmann í tiltekinni grein sem gekk að lokum fram af sér andlega. Hvaða grein var það?

3.  Í hvaða hafi er eyjan Rapa Nui?

4.  En í hvaða firði, flóa, vík eða vogi við Ísland er Hergilsey?

5.  Í hvaða landi heitir forsætisráðherra Victor Orban?

6.  Hvaða fjall gnæfir yfir Selfoss?

7.  Ef þú blandar bláu við gult, hvaða lit færðu þá?

8.  Árið 1917 skipti um ættarnafn sitt einn hluti ættar sem bar þá heitið Saxe-Coburg-Gotha. Hvaða nafn tók þessi hluti ættarinnar upp?

9.  Upp úr aldamótunum 1800 bar hollenskur kaupmaður af Gyðingaættum ættarnafnið Limoenman eftir límónu þeirri eða súraldini sem hann verslaði mikið með og flutti inn frá útlöndum. Syni kaupmannsins líkaði nafnið illa og breytti því. Sá verslaði með demanta og flutti suður til Frakklands, þar sem sonur hans (fæddur 1878) stofnaði fyrirtæki undir hinu nýja nafni fjölskyldunnar og hóf framleiðslu á vörum sem urðu víðfrægar, svo enn er nafnið þekkt. Hvaða nafn tók Limoenman-fjölskyldan sér?

10.  Hver er sterkasti vöðvinn í mannslíkamanum?

***

Seinni aukaspurning:

Einn frægasti og vinsælasti málari Bandaríkjanna á 20. öld gerði ógrynni mynda af mannlífinu þar vestra og prýddu verk hans t.d. óteljandi tímaritakápur. Verk hans þykja núorðið ekki mikil listaverk, hvorki að handbragði né hugsun, en gefa ómetanlega mynd af því sakleysislega samfélagi sem hvítir Bandaríkjamenn vildu trúa að væri við lýði í landi þeirra. Hér að neðan má sjá eina mynda hans. Hvað hét hann?

***

Svör við aðalaspurningum:

1.  Stefan Zweig.

2.  Skák.

3.  Kyrrahafið.

4.  Breiðafirði.

5.  Ungverjalandi.

6.  Ingólfsfjall.

7.  Grænan.

8.  Windsor.

9.  Citroen.

10.  Vöðvinn nefnist tyggjandi á íslensku, masseter á ensku. Í þetta sinn er hins vegar ekki krafist meiri nákvæmni en svo að „vöðvinn í neðri kjálkanum“ gefur rétt svar. Tungan er hins vegar ekki rétt svar.

***

Svör við aukaspurningum:

Plakat Millers af „Rosie the Riveter“ er reyndar oft notað sem tákn um mikilvægi kvenna í atvinnulífinu almennt, en í síðari heimsstyrjöldinni alveg sérstaklega. Hér verður því að nefna síðari heimsstyrjöldina til að fá stig.

Málarinn hét Norman Rockwell.