Fyrri aukaspurning:

Á myndinni hér að ofan má sjá Judith LeClair spila á ... hvaða hljóðfæri?

***

Aðalspurningar:

1.  Hvað hét ný höfuðborg Rússlands sem Pétur mikli keisari stofnaði?

2.  Bubba Morthens þekkja nú allir. En hvað kallar sig bróðir hans, listmálarinn?

3.  Sirimavo Bandaranaike var fyrst kvenna kjörinn forsætisráðherra í heiminum á lýðræðislegan máta. Þetta gerðist árið 1960. En í hvaða landi?

4. Hvaða öld kom á undan járnöld í flokkun sagnfræðinga á menningarstigi fornþjóða?

5.  Árið 1982 náði listakonan Róska ákveðnum áfanga í kvennasögunni þegar hún varð fyrst íslenskra kvenna til að ... gera hvað?

6.  Bærinn Springfield er sögusvið sjónvarpsseríu sem gengið hefur mjög lengi í Bandaríkjunum. Hvað heitir sú sería?

7.  Oft er sagt að höfundar sjónvarpsseríunnar hafi valið nafnið Springfield vegna þess að það sé algengasta nafnið á bæjarfélagi í Bandaríkjunum. Það er reyndar ekki rétt. Springfield er vissulega í öðru sæti yfir algengustu bæjarnöfnin vestra, en 41 bær heitir Springfield í Bandaríkjunum. Mun algengara er samt annað nafn — því 88 bæir af öllum stærðum og gerðum heita ... hvað? Ég tek fram að þótt þið hafi eflaust aldrei heyrt þetta, þá ÆTTUÐI að geta giskað á það.

8.  Í bók einni eru nefndir þeir Mikael, Rafael, Gabríel, Uríel, Sarakvel, Ragúel og Remíel. Hverjir eru þeir?

9.  Helsingi heitir fugl einn sem verpir á Íslandi. Er helsinginn ... andfugl — svartfugl — ránfugl — vaðfugl — ugla?

10.  Hver er sagður hafa skrifað fræðiritgerð sem bar heitið „Um mismunandi ösku ýmissa tóbakstegunda. Stutt ritgerð um ösku 140 ólíkra tegunda af pípu-, vindla- og sígarettutóbaki með litmyndum sem sýna blæbrigði öskunnar“?

***

Seinni aukaspurning:

Hver er þetta?

***

Svör við aðalspurningum:

1.  St.Pétursborg.

2.  Tolli.

3.  Sri Lanka. Ríkið hét raunar Ceylon þá svo það er líka rétt.

4.  Bronsöld.

5.  Leikstýra kvikmynd í fullri lengd (raunar með eiginmanni sínum).

6.  Simpsons.

7.  Washington.

8.  Englar (nafngreindir í Biblíunni). Ég gef líka rétt fyrir erkiengla þó ekki séu þeir allir nefndir erkienglar.

9.  Andfugl, nánar tiltekið gæs.

10.  Sherlock Holmes.

***

Svör við aukaspurningum:

Judith er að spila á fagott.

Á neðri myndinni er Siv Friðleifsdóttir.