Fyrri aukaspurning:

Hvaða fjall er þetta?

***

Aðalspurningar:

1.  Hver var síðasta drottningin sem ríkti yfir Skotlandi einu?

2. Tvö pör ríkja í Bandaríkjunum heita Norður- og Suður-eitthvað. Norður- og Suður-hvað, sem sagt?

3.  Eitt ríki í viðbót er kennt við höfuðátt. Það er Vestur-hvað?

4.  Tvö Evrópuríki hafa einhverja af höfuðáttunum í opinberu heiti sínu. Nefnið að minnsta kosti annað.

5.  Hvers konar kjöt er framleitt mest af í heimi hér — og þar af leiðandi étið mest af því líka?

6.  Hvað gerði Friedrich Paulus þann 31. janúar 1943?

7.  „Heyrðu snöggvast ...“ hver?

8.  Í hvaða sveit er biskupssetrið í Skálholti?

9.  Ef við undanskiljum borgir í Tyrklandi og Rússlandi, hver er þá fjölmennasta borg í Evrópu sem er EKKI höfuðborg í einhverju ríki?

10.  Sumir segja að Campi Flegrei sé hættulegasta eldstöð í heimi. Þar hefur ekki gosið í 500 ár og síðasta gos var reyndar afskaplega lítið en jarðvísindamenn telja að undir sigkatli Campi Flegrei leynist ofureldstöð sem geti gosið þegar minnst varir og yfirborðið tæst í sundur undan fjölmörgum gígum og sprungum og vellandi hraunflóðum. Eldstöðin er í aðeins 10 kílómetra fjarlægð frá milljónaborg einni, þar sem íbúar yrðu í mikilli hættu staddir ef gos hæfist. Ekki nóg með það, heldur er önnur tröllsleg eldstöð í 10 kílómetra fjarlægð frá sömu borg, en í gagnstæðri átt. Hvaða borg er svo ískyggilega staðsett?

***

Seinni aukaspurning:

Þessi stúlka varð sjö ára um daginn. Af hverju komst það í fréttirnar?

***

Svör við aðalspurningum:

1.  María Stúart.

2.  Norður- og Suður-Dakota annars vegar og hins vegar Norður- og Suður-Karólína.

3.  Virginía. 

4.  Norður-Makedónía og Austurríki.

5.  Svínakjöt.

6.  Gafst upp við Stalíngrad.

7.  Snati minn.

8.  Biskupstungum.

9.  Hamborg í Þýskalandi.

10.  Napólí.

***

Svör við aukaspurningum:

Á efri myndinni er fjallið Fuji í Japan.

Stúlkan á neðri myndinni komst í fréttirnar því hún er dóttir Vilhjálms hertoga af Cambridge sem væntanlega verður konungur Bretlands í fyllingu tímans.