Fyrri aukaspurning:

Skoðið myndina hér fyrir ofan. Hver er besti vinur hans? (Vísbending: Það er EKKI fiðrildið.)

***

Aðalspurningar:

1.  Andrómeda var konungsdóttir frá Eþíópíu, að sagt er. En sagnir um ævi hennar er þó að finna í hugmyndaheimi annars lands. Hvaða lands?

2.  Núorðið er önnur Andrómeda öllu þekktari en þessi gamla. Hver er sú Andrómeda?

3.  Margt er á huldu um þróun hesta. Þó er talið nokkuð víst að forfeður og -mæður hinna fyrstu eiginlegu hesta hafi þróast í einni ákveðnni heimsálfu. Hver er sú?

4.  Löngu seinna voru hestar komnir á aðrar slóðir og yfirleitt er talið að forfeður og -mæður taminna hesta hafi þróast á ákveðnu svæði, sem er ... hvað?

5.  Flest innri líffæri mannsins eru einstæð í sinni röð. Við höfum til dæmis aðeins eitt hjarta. En tvö af hinum stóru líffærum eru þó í tvíriti, ef svo má segja. Hver eru þau?

6.  Hvaða ríki tilheyrir Baffinsland?

7.  Í hvaða borg í Evrópu þjónaði Vladimir Pútin sem njósnari KGB?

8.  Við hvað starfaði Naomi Campbell og gerir jafnvel enn þegar vel liggur á henni?

9.  Ingvar Helgason heitir íslenskur hugvits- og athafnamaður sem starfar að vísu fyrst og fremst í útlöndum, en þar eru hann og fyrirtæki hans Vitrolabs í fararbroddi við þróun og framleiðslu á ... hverju?

10.  Eldri bróðir Ingvars er þekktur fjölmiðlamaður á Íslandi. Hvað heitir hann?

***

Seinni aukaspurning:

Hvaða fyrirtæki, stofnun, ríki eða samtök nota lógóið hér að neðan?

***

Svör við aðalspurningum:

1.  Grikklands.

2.  Stjörnuþoka.

3.  Norður-Ameríka.

4.  Mongólía.

5.  Lungu og nýru.

6.  Kanada.

7.  Dresden.

8.  Fyrirsætustörf.

9.  Leðri. Um er að ræða leður úr stofnfrumum. Að segja „gervileður“ er í rauninni ekki rétt, en ég ætla þó að gefa stig fyrir ef einhver slysast til að segja það.

10.  Egill.

***

Svör við aukaspurningum:

Besti vinur Tígra er Bangsímon.

Merkið notar UNICEF, Barnahjálp Sameinuðu þjóðanna.