Mikita Zalatarou var eins og hver annar unglingur, spilaði Minecraft og hlustaði á tónlist, áður en yfirvöld í heimalandi hans, Hvíta-Rússlandi, handtóku hann, pyntuðu og dæmdu til fimm ára fangelsisvistar í fanganýlendu.
Aðdragandi þess var að sumarið 2020 beið Mikita eftir vini sínum á aðaltorgi borgarinnar Homel í suðausturhluta landsins. Nærri honum hafði fólk safnast saman til að mótmæla niðurstöðum forsetakosninganna, þar sem Alexander Lúkasjenkó vann kosningasigur, sem að mati alþjóðlegra eftirlitsaðila var unninn með kosningasvikum.
Í október síðastliðnum var fjallað um að móðir Mikta hefði ekki fengið að heimsækja son sinn í Babruysk-fanganýlendunni. Mikita var dæmdur til enn lengri fangelsisvistar vegna ásakana um að hann hefði beitt fangavörð ofbeldi og hótað öðrum og fjölskyldu hans. Mikita játaði að hafa veitt viðnám og að hafa misst stjórn á tilfinningum sínum, án þess að ætla sér að framfylgja orðum sínum.
Samkvæmt umfjöllun Amnesty International á Íslandi eru til staðar sönnunargögn sem sýna að Mikita kastaði ekki bensínsprengju, heldur hafi hann hlaupið í burtu frá lögreglu þegar áhlaup var gert á torginu.
Amnesty lýsir handtökunni: „Næsta dag birtust lögreglumenn í dyragættinni heima hjá Mikita. Þeir handtóku hann og börðu og ásökuðu hann um að hafa kastað bensínsprengju í áttina að tveimur lögreglumönnum kvöldið áður. Á meðan hann var í gæsluvarðhaldi héldu lögreglumenn honum niðri og börðu með rafkylfu. Mikita var yfirheyrður án þess að lögmaður væri viðstaddur eða annar fullorðinn einstaklingur og sat á bak við lás og slá í sex mánuði áður en hann kom fyrir rétt.“
Amnesty safnar nú undirskriftum til stuðnings frelsunar Mikita.
Athugasemdir