Starfsmaður í farsóttarhúsi Rauða krossins sem rekið er á Fosshóteli Barón greindist með Covid-19 um hádegisbil í dag. Sex aðrir starfsmenn eru komnir í sóttkví vegna þessa og starfsemi farsóttarhússins í uppnámi. Er þetta í fyrsta skipti sem starfsmaður farsóttarhúsanna smitast frá því þau voru opnuð.

Gylfi Þór Þorsteinsson, forstöðumaður farsóttarhúsanna, segir í samtali við Stundina að verið sé að bregðast við tíðindunum. „Það kom upp smit hjá hótelstarfsmanni sem hefur unnið í móttöku á einu af hótelunum okkar. Það smit virðist hafa komið utan frá, það er ekki af farsóttarhótelinu, en óneitanlega setur þetta eitthvað af okkar starfsfólki í sóttkví. Ég er akkúrat þessa stundina að vinna aðgerðaráætlun um hvað við gerum og hvernig.“

Gylfi segir að smit starfsmannsins snerti samstarfsfók hans sem nú er komið í sóttkví. Sömuleiðis þurfa fjölskyldumeðlimir í það minnsta einhverra starfsmannanna einnig að fara í sóttkví. „Við fyrstu sýn virðist þetta snerta einhverja sex starfsmenn, sem eru í raun heil vakt hjá okkur. Þetta mun hafa töluverð áhrif á þetta hótel sem um ræðir og við erum að vinna að því með rakningarteyminu að því að leysa þetta vandamál með góðum hætti. Það er ómögulegt að segja hversu marga aðra, fjölskyldur starfsmanna til að mynda, þetta snertir.“

Að sögn Gylfa er þetta í fyrsta skipti sem starfsmaður farsóttarhúss hefur greinst með Covid-19 kórónaveiruna. „Við höfum fengið til okkar 900 Covid sýkta þannig að það var nú kannski bara tímaspursmál hvenær þetta myndi gerast.“

Smitið gæti kallað á að fleira starfsfólk verði fengið til starfa við farsóttarhúsin, að sögn Gylfa. Það er þó ekki ljóst á þessari stundu. „Þetta gæti líka kallað á að við þurfum að færa þá gesti sem eru á þessu hóteli eitthvað annað, ég er að vinna í því. Við reddum þessu.“