Júlí hefði orðið metmánuður hjá tjaldsvæðinu Hömrum á Akureyri hefði nýjustu sóttvarnaraðgerðir ekki litið dagsins ljós. Á Hallormsstað er þessi mánuður þegar sá fjölmennasti sem sést hefur. Þetta segja yfirmenn á þessum tjaldsvæðum.

„Miðað við fyrri hluta júlí vorum við með yfir fjórtán þúsund fleiri gistinætur en í fyrra. Ef þetta hefði haldið svoleiðis áfram hefðum við klárlega slegið met,“ segir Tryggvi Marínósson hjá tjaldsvæðinu Hömrum um þá gífurlegu aðsókn sem verið hefur í sumar. „Núna verður það væntanlega ekki,“ segir hann, enda botninn sleginn úr. Gestum hafi fækkað úr um tvö þúsund á nóttu niður í um þrjú hundruð manns sem nú eru á svæðinu.

Nýjar sóttvarnarreglur tóku nýverið gildi á Akureyri með tilheyrandi áhrifum á tjaldsvæði bæjarins. Í tilkynningu á vef Akureyrarbæjar er biðlað til íbúa að leita annað en að Hömrum eftir útivist og afþreyingu í ljósi nýjustu takmarkanna vegna Covid.

Gestir spyrja sig tvisvar um gagnaöflun og skráningu

Hamrar eru með stærri tjaldsvæðum landsins og geta þar gist hátt í þriðja þúsund gesta þegar mest er. „Þetta er náttúrulega hörmung,“ segir Tryggvi um rekstur tjaldsvæða í ástandinu sem verið hefur. „Við lentum líka í svona bröttum takmörkunum í fyrra á fimmtudegi fyrir verslunarmannahelgi, þá vorum við líka með fullt tjaldsvæði og þurftum að fækka um fleiri hundruð manns með skömmum fyrirvara.“

„Maður skilur sjónarmiðin bak við þetta þótt þetta geti verið íþyngjandi“

Meðal nýrra ráðstafana núna nefnir hann skráningu allra gesta með nafni, kennitölu, heimilisfangi og síma. „Maður skilur sjónarmiðin bak við þetta þótt þetta geti verið íþyngjandi,“ segir Tryggvi. Ekki séu allir gestir sáttir með þær ráðstafanir. „Það kemur fyrir að menn spyrji sig tvisvar hvers vegna við þurfum allar þessar upplýsingar.“

Meðal nýjunga í þessari fjórðu bylgju faraldursins er að börn niður í sex ára eru skráð sem hluti af þeim hámarksfjölda sem gista má í hverju sóttvarnarhólfi. 

Júlí þegar orðinn metmánuður í Hallormsstaðaskógi

Bergrún Þorsteinsdóttir hjá tjaldsvæðinu Hallormsstaðaskógi segir svipaða sögu og Tryggvi. Þessi mánuður er tvímælalaust stærsti júlímánuður sem þau hafa séð. Fækkað hefur gífurlega hjá þeim undanfarna daga en Bergrún spyr sig hvort það sé ekki helst við veðurguðina að sakast.

„Við búum svo vel að vera með mörg klósetthús og getum þess vegna raðað gestum í fleiri hólf,“ útskýrir Bergrún. „Því er ekki að fagna á öllum tjaldsvæðum og því getur munurinn verið mikill.“ Með sínum fjölmörgu klósetthúsum geta tjaldsvæðin í Atlavík og Höfðavík, sem bæði eru í Hallormsstaðaskógi, boðið til sín allt að sjö hundruð manns í góðri sátt við sóttvarnalög, segir Bergrún.