Þann 18. mars síð­ast­lið­inn opn­uðu mynd­list­ar­menn­irnir Almar Steinn Atlason og Hákon Bragason dyrnar upp á gátt, Drop in hús­gögn, engar tímapant­anir, smíða­verk­stæði stað­sett í Gunn­fríð­ar­gryfju í Ásmund­ar­sal. Saman mynda þeir lista­tvíeykið Brjálað að gera og hafa síð­ustu vikur framið praktískan gjörn­ing í gryfj­unni og smíðað hús­gögn/skúlp­t­úra eftir pönt­unum, gegn vægu gjaldi. „Við setjum þetta upp sem skemmti­lega upp­lifun, að koma á verk­stæði lista­manna þar sem ríkj­andi er stemn­ing, við­arilmur og kaffi­brúsar,“ lýsa Almar og Hákon.

Dúóið hefur unnið mikið saman í gegnum tíð­ina og hafa alltaf tekið ríkan þátt í sköp­un­ar­ferli verka hvors ann­ars, en þetta er í annað skiptið sem þeir setja upp sýn­ingu saman. Verk­stæðið verður opið fram til 1. apríl svo það er enn tími til að kom­ast í hóp ánægðra við­skipta­vina. Opn­un­ar­tími er frá níu til fimm alla virka daga og frá tíu til fimm um helgar. 

Engar tímapantanir leyfðar

Verk­efnið lýsir sér þannig að fólk getur komið og pantað sér­smíðuð hús­gögn, sér­sniðin að þeirra þörfum, sem fram­leidd eru sam­stundis og afhent klukku­stund síðar. Almar og Hákon þurfa að hafa hraðar hendur og klára hús­gögnin á meðan fólk hoppar í búð eða fær sér kaffi­bolla. En það mynd­ast góð stemn­ing og kjörað­stæður til heita­portsum­ræðna. „Við erum líka með bið­stofu þar sem hægt er að bíða eftir næsta lausa tíma.“ Hill­billy hefur einmitt dálæti af bið­stofum og mik­ill plús að skúlp­túr eða hús­gagn bíði manns að bið lok­inni en ekki tungu­spaði í koki. „Við höfum báðir alltaf verið heill­aðir af feg­urð­inni á dekkja­verk­stæðum, í nör­da­vöru­versl­unum og þesslags menn­ing­ar­kimum. Okkur lang­aði að sýna slíka feg­urð á safni.“

Hug­myndin að verk­efn­inu kvikn­aði vegna söfn­un­ar­áráttu mynd­list­ar­mann­anna tveggja og fannst þeim þeir þurfa á ein­hvern hátt að rétt­læta öll pláss­freku verk­færin sem þeir höfðu sankað að sér í gegnum tíð­ina. Þeir fóru rak­leiðis á Youtube og kenndu sjálfum sér á öll þessi verk­færi. „Svo höfum við heyrt að það sé næstum jafn lítið að hafa uppúr hús­gagna­smíði og mynd­list svo við ákváðum að færa okkur upp um tekju­þrep í hæga­gang­inum,“ útskýra þeir. „Úthald, praktískir gjörn­ingar og tré­smíði eru líka allt bara svo dásam­legir hlutir.“

Ekkert ábyrgðarskírteini

Verð­lagn­ingu er haldið í lág­marki svo sem flestir geti orðið sér úti um sér­smíðuð hús­gögn á met­hraða. Hús­gögnin eru öll fram­leidd án ábyrgð­ar­skír­teinis en mynd­list­ar­menn­irnir tveir setja sér og við­skipta­vinum sínum reglur um fram­kvæmd hús­gagn­anna og áskilja sér heim­ild til að túlka pöntun, teikn­ingu, mæli­ein­ingar og efni eftir eigin henti­semi. „Efni­við­ur­inn er meira og minna timbur, aðal­lega ódýrt timbur nema annað sé sér­stak­lega tekið fram.“ Varðandi hvers lags hús­gögn sé hægt að panta segj­ast þeir vera opnir fyrir öllu. „Við höfnum engri pöntum, gerum alltaf eitt­hvað,“ útskýra þeir og er Hill­billy for­vitin um hvort dúóið hafi reynslu af hús­gagna­smíði og svarið er ein­falt: „Ef við hefðum ein­hverja hald­bæra reynslu af hús­gagna­smíði hefðum við aldrei vaðið svona kátir út í þetta verk­efni.“ Hákon smíð­aði að vísu einu sinni kaffi­borð en Almar seg­ist verða feim­inn og fá aðsvif í nálægð sand­papp­írs. Hill­billy glottir að til­hugs­un­inni.

Hratt, flott og ódýrt

Drop in Húsgögn, engar tímapant­anir er sam­fé­lags­rýn­inn gjörn­ingur. Almar og Hákon vinna með mörk mynd­listar og hönn­unar, gjörn­ing­inn sem praktískt list­form og hrað­ann sem við búum í í sam­fé­lag­inu í dag.

Aðspurðir hvernig þeir vilja tengja verk­efnið neyslu­sam­fé­lag­inu svara þeir: „Við elskum hratt, flott og ódýrt. Hvað er hægt að gera á klukku­tíma? Við vitum það ekki en okkur langar gjarnan að prófa.“ Þeir velta upp spurn­ingum á borð við „Afhverju er þvotta­vél sem þvær á hálf­tíma góð en þvotta­vél sem þvær á þremur klukku­stundum léleg ef þvott­ur­inn kemur jafn­hreinn úr báðum? Hvers vegna kostar full vín­flaska í rík­inu 1.800 kr. en tóm vín­flaska í hús­gagna­verslun 7.000 kr.? Myndum við ráða okkur í vinnu upp á 1.800 kr.- á tím­ann? Myndum við vinna í klukku­stund í skiptum fyrir vín­flösku?“ Þeir hafa engin svör en ákváðu þó að vaða blátt áfram í þetta verk­efni og hafa hingað til fengið góð við­brögð. „Við erum him­in­lif­andi, finnum fyrir miklum með­byr og stuðn­ingi úr flokknum. Næstum því meira að segja þrýst­ingi eftir breyttri for­ustu úr gras­rót­inni.“ Það endar kannski með því að þessir ódýru hlutir endi sem rán­dýr upp­boðs­fengur í fram­tíð­inni. Hver veit svosem?

Dúóið heldur áfram að varpa spurn­ingum út í algleymið. „Af hverju erum við með borð­stofu­borð sem passar næstum því í stof­unni og afhverju er hel­vítis skógrindin alltaf að detta? Við erum bara svona að spek­úlera þetta. Værum við klukku­tíma að blása gler­flösku, stappa ber­fættir á nokkrum berja­runnum og hella svo sull­inu í flösk­una? Nei maður bara spyr sig svona af og til.“

Í Covid fréttum segir dúóið það vera dásam­legan tíma fyrir unga mynd­list­ar­menn og kvarta ekki. „Meiri tími fyrir stúd­íó­vinnu, minni aðsókn á sýn­ingar og aukið umburð­ar­lyndi fyrir óvinn­andi auðnu­leys­ingjum.“