Julian Assange, stofnandi Wikileaks, verður ekki látinn laus gegn tryggingu. Þetta staðfesti dómari í Lundúnum í morgun, tveimur dögum eftir að framsalsbeiðni Bandaríkjastjórnar var hafnað á þeim forsendum að Assange myndi vera í lífshættu vegna bágs ástands í fangelsismálum þar í landi. 

 Í morgun féllst dómarinn hins vegar á þau rök saksóknara að vegna þess víðtæka stuðnings sem Assange nyti um allan heim væri mikil hætta á að hann nýtti sér tengslanet og velvild í sinn garð til að reyna að flýja land.

Framsalsbeiðnin er nú í áfrýjun en þrátt fyrir það er ekki ljóst hvort Bandaríkjastjórn muni halda málinu til streitu. Kristinn Hrafnsson, ritstjóri Wikileaks, segir líklegt að það falli í hlut Biden stjórnarinnar að skipa saksóknara sem taki afstöðu til þess hvort málið verði látið falla niður og framsalsbeiðnin þá felld úr gildi áður en málið fari fyrir áfrýjunardómstól. Nýleg ummæli fráfarandi saksóknara bendi til þess að það sé góður möguleiki. Sá sagði í nýlegu viðtali við NPR fréttastofuna að arftaki sinn stæði frammi fyrir erfiðri forgangsröðun og hlyti að velta fyrir sér hvort hann vildi eyða meiri orku í þetta mál.

 Úrskurðurinn er mikið áfall fyrir Assange og hans fjölskyldu að sögn Kristins, en Assange hefur ekki hitt börn sín eða unnustu svo mánuðum skiptir og verður nú í einangrun í fangelsinu vegna Covid-19. Faraldurinn hefur breiðst hratt um Belmarsh fangelsið síðustu mánuði og segir Edward Fitzgerald, lögmaður Assange, að helmingur fanga á sama gangi hafi smitast, þá séu meira en 80 fangaverðir í sóttkví vegna gruns um smit.