Hér er þrautin frá gærdeginum. Prófið hana!

Aukaspurningar:

Hvaða boxari er það sem mundar hanska hér á efri myndinni?

Og hvað heitir staðurinn, sem sjá má á neðri myndinni?

En þá koma hér aðalspurningarnar tíu:

1.   Árið 2018 tók Ísland í fyrsta sinn þátt í heimsmeistaramóti karla í fótbolta. Mótið var háð í Rússlandi. Fyrsti leikur Íslands var við Argentínu og óvænt náðist 1-1 jafntefli. Hver skoraði mark Íslands?

2.   Síðasta áratuginn hafa Bretar vart ráðið sér af fögnuði yfir þrem bókum konu einnar sem fjalla allar í skáldsöguformi um ævi og störf Thomas Cromwell, ráðgjafa Hinriks kóngs áttunda. Nú þegar hefur verið gerð vinsæl sjónvarpssería eftir tveimur fyrstu bókunum og kallast Wolf Hall. Konan hefur fengið öll verðlaun sem í boði eru á Bretlandi og útnefnd „dama breska heimsveldisins“. Hvað heitir hún?

3.   Hvað heitir höfuðborgin í Sviss?

4.   Kona ein hét Christa Päffgen, hún fæddist í Þýskalandi 1938, sló í gegn sem fyrirsæta ung að árum og fór svo að fást við músík í New York þar sem hún söng með Velvet Underground, hljómsveit sem mjög tengdist nafni listamannsins Andy Warhols en raunar var Lou Reed aðalsprauta hljómsveitarinnar. Hún Christa okkar fékkst síðan við tónlist til æviloka en hún dó aðeins fimmtug þegar hún datt af reiðihjólinu sínu á Mallorca. Alltaf var hún kunnust undir gælunafni sem ljósmyndari einn gaf henni snemma á fyrirsætuferlinum. Hvað kallaðist hún?

5.   Ragnheiður Runólfsdóttir var aðeins önnur konan frá 1958 sem var útnefnd íþróttamaður ársins 1991 en hver var hennar íþróttagrein?

6.   Medea er kona ein kunn úr grískum þjóðsögum og goðsögum. Ekki er minning hennar þó sveipuð gleði og hamingju, því hún er kunn fyrir einn hræðilegasta verknað í samanlögðum goðsögunum - þótt hún sé raunar ekki ein um þennan glæp í fornum sögnum. Hvað gerði Medea af sér?

7.   Árið 1997 kom út bókin Elsku besta Binna mín eftir nýjan barnabókahöfund sem hefur síðan gefið út bók á ári, því sem næst, og flestallar náð miklum vinsældum. Einna kunnastar eru líklega bækur þar sem söguhetjan Fíasól leikur lausum hala. Hvað heitir höfundurinn?

8.   Þórdís Kolbrún Reykfjörð Gylfadóttir heitir ráðherra í ríkisstjórn Íslands. En hún heitir ekki bara löngu nafni, heldur ber hún líka lengsta ráðherratitilinn. Hver er hann - orðréttur?

9.   Við hvaða fjörð stendur Akureyri?

10.   Hvaða gyðja norrænna manna ferðaðist um í vagni sem tveir dugmiklir kettir drógu?

Svörin eru þessi:

1.   Alfreð Finnbogason.

2.   Hilary Mantel.

3.   Bern.

4.   Nico. Hér má heyra hana flytja lagið eftirminnilega, All Tomorrow's Parties, með Velvet Underground.

5.   Sund.

6.   Hún myrti börn sín til að hefna sín á föður þeirra.

7.   Kristín Helga Gunnarsdóttir.

8.   Hún er ferðamála-, iðnaðar- og nýsköpunarráðherra.

9.   Eyjafjörð.

10.   Freyja.

Aukaspurningarnar:

Á myndinni er að sjálfsögðu Pálmi Gestsson, sem er vissulega ekki boxari að meginstarfi en hefur hins vegar á leikaraferli sínum brugðist sér í flestra kvikinda líki.

Þar á meðal lék hann þann boxara sem á myndinni sést.

Á neðri myndinni er aftur á móti Inkaborgin Machu Picchu í Andesfjöllum.