Meirihlutinn í Reykjanesbæ segir fréttir af áhuga Atlantshafsbandalagsins (NATO) á uppbyggingu í Helguvík vera „sögusagnir“.

Reykjaneshafnir hafa málið á teikniborðinu, þó að engin fyrirspurn hafi borist frá NATO um slíka uppbyggingu. Ásmundur Friðriksson, þingmaður Sjálfstæðisflokks, er einnig mikill hvatamaður að því og segir uppbygginguna geta numið 16,5 milljörðum króna. Katrín Jakobsdóttir forsætisráðherra hefur hins vegar sagt að engar formlegar viðræður hefðu átt sér stað um málið, sem væri enn aðeins hugmynd Guðlaugs Þórs Þórðarsonar utanríkisráðherra sem fram kom í vinnu við fjáraukalög.

Margrét Þórarinsdóttir, bæjarfulltrúi Miðflokksins, lagði fram tillögu á fundi bæjarstjórnar Reykjanesbæjar í gær um að hvetja ríkisstjórnina til að útiloka ekki slíka uppbyggingu. Benti hún á að atvinnuleysi á Suðurnesjum sé slíkt að fjórði hver íbú sé nú án atvinnu.

„Borist hafa fréttir af áhuga Atlantshafsbandalagsins (NATO) á uppbyggingu í Helguvík fyrir milljarða króna og að utanríkisráðherra hafi lagt til að það yrði liður í auknum framkvæmdum hins opinbera á Suðurnesjum vegna áhrifa heimsfaraldursins,“ segir í tillögunni. „Yrði af framkvæmdum myndi það hafa verulega jákvæð áhrif fyrir svæðið. Bæjarstjórn Reykjanesbæjar hvetur ríkisstjórnina til að standa sameinuð í baráttunni gegn þeirri alvarlegu stöðu sem komin er upp í atvinnumálum Suðurnesja og útiloka ekkert í þeim efnum.“

„[Við] viljum ekki taka þátt í pólitísku moldvirði alþingismanna“

Friðjón Einarsson, formaður bæjarráðs, tók þá til máls og lagði fram bókun fyrir hönd meirihlutans. „Við teljum óeðlilegt að bæjarfulltrúar í Reykjanesbæ taki undir „sögusagnir“ um áhuga NATO um að ráðast í miklar framkvæmdir í Helguvík sem nemur mörgum milljörðum. Forsætisráðherra sagði á þingi í gær að engar upplýsingar hefðu komið fram um meintan áhuga þeirra í þessu máli, en að ef svo væri þyrfti þetta að fara fyrir Alþingi. Við höfum lýst yfir áhuga á uppbyggingu í Helguvík i samstarfi við alla áhugasama aðila en viljum ekki taka þátt í pólitísku moldvirði alþingismanna.“

Tillagan var felld með atkvæðum meirihluta Beinnar leiðar, Framsóknar og Samfylkingar gegn atkvæðum fulltrúa Miðflokksins og Sjálfstæðisflokksins.