Helga Vala Helgadóttir, þingmaður Samfylkingarinnar, kallar eftir því að þingmenn sameinist um að breyta stjórnarskránni með þeim hætti að þjóðin geti kosið um stjórnarskrárbreytingar. Hún segir stjórnarflokkana vera ósammála um hvort eigi að breyta stjórnarskránni, þrátt fyrir að forsætisráðherra hafi boðað til samráðs um málið.
Birgir Ármannsson, þingflokksformaður Sjálfstæðisflokks, skrifaði grein í Morgunblaðið í dag þar sem hann sagði dæmi um það frá fyrri tíð að stjórnmálamenn reyni að ná óskyldum pólitískum markmiðum í stað þess að einbeita sér að endurreisn efnahagslífsins eftir hrun. Vísaði hann þar til ríkisstjórnar Jóhönnu Sigurðardóttur í kjölfar bankahruns. Hann varaði við því að slíkt gæti tafið fyrir og truflað stjórnmálin á næstu vikum og mánuðum.
„Meðan við glímum við efnahagskreppu, sem gæti orðið sú dýpsta í áratugi, er ekki hjálplegt eða líklegt til árangurs að stjórnmálamenn berist á banaspjót vegna hugsanlegra stjórnarskrárbreytinga, Evrópusambandsaðildar eða einhvers konar róttækrar umbyltingar á þjóðfélagsgerðinni,“ skrifaði Birgir.
Hann ítrekaði efni greinarinnar í ræðustól Alþingis í dag undir liðnum störf þingsins. „Það sem á okkur brennur núna hefur ekkert með stjórnarskrána að gera,“ sagði hann. „Ég held að reynslan frá árunum 2009 til 2013 ætti að kenna okkur að við eigum ekki að eyða orkunni í deilur af því tagi þegar við getum verið að vinna að raunverulegum úrbótum, raunverulegum framfararmálum sem skila efnahagslegum bata fyrir þjóðfélagið.“
„Ég held að reynslan frá árunum 2009 til 2013 ætti að kenna okkur að við eigum ekki að eyða orkunni í deilur af því tagi“
Helga Vala kom í pontu í kjölfarið og benti á að Katrín Jakobsdóttir forsætisráðherra hefði boðað formenn flokkanna á Alþingi á fund um stjórnarskrármál nú á föstudag, en slíkt samráð hafi ekki orðið í efnahagsmálum. „Á sama tíma og við í stjórnarandstöðunni höfum verið að kalla eftir samráði og fáum að horfa á blaðamannafundi ríkisstjórnarinnar um það sem á að fara að gera, þá boðar hæstvirtur forsætisráðherra formenn flokka á Alþingi til samráðsfundar, einmitt um breytingar á stjórnarskránni. Og hér var þingflokksformaður Sjálfstæðisflokksins, eins af þremur turnum í ríkisstjórninni, að tala niður fundarboð forsætisráðherra um nauðsynlegar breytingar á stjórnarskránni og þá vinnu sem þar er í gangi,“ sagði Helga Vala.
„Afstaða þingflokksformanns Sjálfstæðisflokksins til breytinga á stjórnarskránni er okkur öllum ljós“
Hún kallaði eftir því að þingmenn sammældust um að breyta breytingaratkvæði stjórnarskrárinnar, svo að þjóðin geti kosið um breytingarnar. Sagði hún Birgi og aðra stjórnmálamenn þvælast fyrir breytingunum. „Það er pínulítið sérstakt að standa fyrir utan þetta og fylgjast með stjórnarflokkunum takast á um verkstjórnina og hvernig eigi að haga málum,“ sagði hún. „En ég auðvitað fagna því alltaf ef við náum einhverjum skrefum áfram varðandi breytingar á stjórnarskránni. Afstaða þingflokksformanns Sjálfstæðisflokksins til breytinga á stjórnarskránni er okkur öllum ljós, enda hefur hann alls ekki leynt, heldur mjög svo ljóst barist gegn breytingum á stjórnarskránni síðan hann settist á þing.“
Hanna Katrín Friðriksson, þingmaður Viðreisnar, ræddi einnig málið. „Á umbrotatímum sem þessum þar sem við kveðjum mögulega veröld sem var og horfum fram á breytta heimsmynd – ef nú eru ekki tímar til að uppfylla óskir þjóðarinnar um tilteknar breytingar á stjórnarskránni okkar, um jöfnun atkvæðaréttar og tímabundið auðlindaákvæði – hvenær þá?“ sagði hún á þingi. „Ef staða okkar innan Evrópu, kostir og gallar aðildar að Evrópusambandinu er ekki mikilvægt innlegg í kortlagningu á stöðu okkar og áskoranir í ljósi breyttrar heimsmyndar núna - hvenær þá? Er svar háttvirts þingmanns að það sé aldrei rétti tíminn?“
Athugasemdir