„Við fengum áfall við að horfa á þetta og héldum að þyrlan hefði hrapað,” segir maður sem var í 15 manna gönguhópi á leið upp Hengil, skömmu fyrir hádegi í gær.

Göngumaðurinn, sem ekki vill láta nafns síns getið, segir að hópurinn hafi verið kominn langleiðina upp á Vörðuskeggja, hæsta tind Hengilsins, þegar þyrla birtist og flaug rólega yfir tindinum. Skyndilega stefndi hún með nefið á undan og miklum drunum niður fjallið.

„Þegar við heyrðum af þyrluslysinu í gærkvöld kom þetta atvik strax upp” 

Rúmlega átta klukkustundum síðar hrapaði þyrla í eigu Ólafs Ólafssonar athafnamanns á þessu svæði með þeim afleiðingum að þrír af fimm manns sem voru um borð slösuðust. Viðmælandi Stundarinnar segir þyrluna sem gönguhópurinn sá vera mjög líka þeirri sem steypt var niður við Vörðuskeggja.

„Okkur var öllum mjög brugðið við að sjá hana stefna á miklum hraða niður. Nefið var á undan. Þegar við heyrðum af þyrluslysinu í gærkvöld kom þetta atvik strax upp í huga,” segir göngumaðurinn.

Þyrla Ólafs skráð í Sviss

Stundin hafði samband við svissnesk flugmálayfirvöld en þar höfðu menn ekki fengið tilkynningu um flugslysið en þyrla Ólafs Ólafssonar er skráð þar í landi í gegnum tvö félög sem hafa annarsvegar aðsetur í Kaupmannahöfn og hinsvegar í Sviss.

Ekki hefur fengist staðfest hjá flugmálayfirvöldum hér á landi hvort þyrlan sem gönguhópurinn sá sé sú sama og brotlenti klukkan 19:49 en þá barst gervihnetti neyðarboð um slysið. Samkvæmt heimildum Stundarinnar hefur þyrla Ólafs í tvígang, á fimm dögum, slökkt á búnaði sem gerir almenningi kleyft að fylgjast með ferðum hennar yfir landinu.