Fylltu bensínbrúsa Vitni sem var staddur á bensínstöðinni segir þrjá menn hafa fyllt á tvo bensínbrúsa og skömmu síðar hafi sést reykjarmökkur yfir Breiðholtinu.

Tveir menn voru handteknir á sjötta tímanum í morgun grunaðir um að hafa kveikt í þremur bifreiðum í Breiðholti.

Samkvæmt fréttatilkynningu frá lögreglunni á höfuðborgarsvæðinu eru þeir nú vistaðir í fangageymslu en heimildir Stundarinnar herma að mennirnir hafi verið þrír.

Samkvæmt sömu heimildum komu umræddir menn inn á bensínstöð Skeljungs við Breiðholtsbraut um klukkan sex í morgun, fylltu á tvo bensínbrúsa og skömmu síðar sást reykjarmökkur í nærliggjandi hverfi. Vitni segja þrjár bifreiðir hafa gjöreyðilagst í íkveikjunni en ekki liggja fyrir frekari upplýsingar um málið hjá lögreglunni.

Meðfylgjandi ljósmyndir voru teknar af íbúa í Breiðholti sem hafði samband við Stundina.