Björn Valur Gíslason, varaþingmaður og varaformaður Vinstri grænna, vill vita hvort Bjarni Benediktsson forsætisráðherra hafi kallað eftir upplýsingum frá ráðherrum ríkisstjórnarinnar um hugsanlega fjárhagslega hagsmuni þeirra og tengdra aðila vegna samkomulags við eigendur aflandskróna og breytinga á reglum um fjármagnsflutninga. 

Björn lagði fram fyrirspurn um málið á Alþingi í dag. Þar er spurt hvort einhverjir ráðherrar hafi upplýst innan ríkisstjórnar um fjárhagslega hagsmuni sína eða tengdra aðila vegna málsins og hvort forsætisráðherra telji ástæðu til að kalla eftir frekari upplýsingum um hugsanlega fjárhagslega hagsmuni samráðherra sinna.

Í greinargerð sem fylgir fyrirspurn Björns Vals er bent á að í ræðu um afnám gjaldeyrishafta á Alþingi þann 13. mars síðastliðinn sagði Benedikt Jóhannesson fjármála- og efnahagsráðherra að miklir hagsmunir væru í húfi við afnám haftanna. Um þau giltu innherjareglur og mikilvægt væri að allir markaðsaðilar sætu við sama borð.

„Sumir þeirra komu á vettvang stjórnmálanna,
og skömmu síðar í ráðherraembætti, beint úr störfum fyrir hagsmunaaðila“

„Í ríkisstjórninni eiga nú sæti nokkrir ráðherrar sem haft hafa mikil tengsl í atvinnu- og viðskiptalífinu. Sumir þeirra komu á vettvang stjórnmálanna, og skömmu síðar í ráðherraembætti, beint úr störfum fyrir hagsmunaaðila og aðrir rakleitt frá því að vera virkir aðilar og stjórnendur í fjármála- og viðskiptalífinu,“ skrifar Björn Valur.

„Nýlegar ráðstafanir í gjaldeyrismálum geta varðað miklu fyrir ýmsar greinar atvinnustarfsemi og viðskipta. Mikilvægt er að hafið sé yfir allan vafa að ráðherrar og aðilar þeim tengdir hafi ekki haft hagsmuni af slíkum ákvörðunum umfram almenning og þær kringumstæður sem að framan var lýst krefjast þess að um það sé spurt.“