Fjölmennt lið lögreglunnar á höfuðborgarsvæðinu ásamt sérsveitarmönnum frá Ríkislögreglustjóra lokuðu öllum leiðum inn og út úr Bryggjuhverfinu í Grafarvogi um klukkan tíu í gærkvöldi. Íbúi í hverfinu sem Stundin ræddi við segir að lögreglumenn hafi leitað að vopnuðum karlmanni í Adidas-galla.

„Ég get staðfest að lögregluaðgerð átti sér stað í Bryggjuhverfinu í gærkvöldi. Meira get ég ekki sagt en við munum gefa út fréttatilkynningu á eftir,“ segir Valgarður Valgarðsson, aðalvarðstjóri hjá lögreglunni á höfuðborgarsvæðinu.

Vopnaðir á vappi um hverfið

Umrætt vitni sagði lögregluaðgerðina hafa staðið í nokkrar klukkustundir. Lögreglan hafi verið búin að loka hverfinu um tíu-leitið í gærkvöldi og um klukkan tvö í nótt voru lögreglumenn enn á „vappi um svæðið“ eins og hann orðaði það. Þeir hafi verið vopnaðir og gráir fyrir járnum.

Stundin náði tali af stöðvarstjóranum Kristjáni Ólafi Guðnasyni en hann hefur umsjón með málinu hjá lögreglunni á höfuðborgarsvæðinu. Hann segir rannsókn þess enn í gangi.

Þannig að þessu máli lauk ekki í gærkvöldi?

„Vonandi er þetta langt komið en það er ekki hægt að segja að þessu sé lokið,“ sagði Kristján Ólafur og bætti við að von væri á fréttatilkynningu frá lögreglunni innan tíðar.

Töluverður erill hjá lögreglu

Lögreglan á höfuðborgarsvæðinu hafði í nógu að snúast í gærkvöldi og í nótt. Rétt fyrir ellefu í gærkvöldi þá var tilkynnt um heimilisofbeldi og líkamsárás í austurbænum. Enginn handtekinn vegna málsins og litlir sem engir áverka á þolanda.

Þá var einnig rétt fyrir ellefu í gærkvöldi tilkynnt um mann í annarlegu ástandi  utan við hús í vesturbænum og var lögregla send á vettvang. Skömmu síðar var karlmaður handtekinn skammt frá vettvangi, en hann hafði þá reynt að kveikja í bifreið sem stóð við húsið en lögreglumönnum tókst að slökkva eldinn. Maðurinn hafði einnig í hótunum við íbúa í fleiri húsum og lét mjög ófriðlega. Hann vistaður í fangageymslu vegna frekari rannsóknar málsins.

Þá var ökumaður stöðvaður rétt fyrir fjögur í nótt grunaður um akstur undir áhrifum áfengis. Hann var laus að lokinni blóðtöku.

Uppfært: Tilkynning lögreglu kl. 12.08

Fjölmennt lið lögreglu leitaði að karlmanni í Bryggjuhverfinu í Reykjavík í gærkvöld, eftir að íbúi þar tilkynnti um alvarlegar hótanir sem honum höfðu borist símleiðis auk þess sem tilkynning barst skömmu síðar um mann í hverfinu vopnaðan hnífi. Tilkynningarnar voru metnar alvarlegar og viðbúnaður lögreglu í samræmi við það. Fólust aðgerðir meðal annars í því að lokað var tímabundið fyrir umferð á svæðinu meðan leit stóð yfir. Sérsveit ríkislögreglustjóra var  enn fremur kölluð á vettvang.

Aðgerð lögreglu stóð yfir í ríflega þrjár stundir og lauk með handtöku á manni á þrítugsaldri, en sá  tilkynnti upphaflega um mann með hníf. Tilkynnandinn var óvopnaður.

Hættuástandi var aflétt rétt ríflega eitt í gærkvöldi. Hinn handtekni bíður yfirheyrslu.