Bæjarfulltrúinn Friðjón Einarsson sem býr í Reykjanesbæ varð fyrir því óláni á föstudagskvöldið að reiðhjóli hans var stolið. Nú þegar nær dregur sumri fer þjófnaði á reiðhjólum að fjölga. Varðstjóri á Suðurnesjum segir að vegna sívaxandi vinsælda reiðhjóla þá séu þessir þjófnaðir allan ársins hring.

„Fyrirgefning er eingöngu til án eftirmála og ef því er skilað þá er málinu bara lokið af minni hálfu“

„Hjólinu var stolið á föstudagskvöldið síðasta þegar ég var í fimmtugsafmæli hjá vini mínum. Hjólið var vel fallið í innkeyrslunni hjá mér en það virtist ekki hafa skipt neinu máli,“ segir Friðjón sem notað hefur reiðhjólið sitt undanfarin ár alla daga ársins.

Friðjón Einarsson Bæjarfulltrúi í Reykjanesbæ

Hann var nýbúinn að skipta út nagladekkjunum og stilla hjólið fyrir sumarið.

„Hjólið mitt er farartæki alla daga ársins og loksins þegar sumarið er komið að þá er ansi súrt að því sé stolið. Loksins þegar maður þarf ekki að vera vel dúðaður í hlífðarfötum,“ segir Friðjón sem vorkennir þeim sem stálu hjólinu hans. Hann segist þó maður fyrirgefningar og að það eina sem hann vilji sé reiðhjólið tilbaka.

„Reiðhjólið mitt var læst fyrir utan heima og því var stolið“ 

„Fyrirgefning er eingöngu til án eftirmála og ef því er skilað þá er málinu bara lokið af minni hálfu,“ segir Friðjón og bætir við að hægt sé að skila því á Suðurgötu 51 í Reykjanesbæ eða bara þangað sem hann getur sótt það.

Reiðhjóli varðstjórans stolið

Stundin hafði samband við lögregluna á Suðurnesjum og ræddi við varðstjórann Bjarneyju Annelsdóttur. Hún hefur sjálf lent í því að reiðhjóli hennar var stolið en það var í fyrra.

„Reiðhjólið mitt var læst fyrir utan heima og því var stolið. Þessir þjófnaðir eru nú allan ársins hring en við hvetjum hjólreiðaeigendur til þess að geyma þau innandyra svo ekki sé auðvelt að stela þeim,“ segir Bjarney.