Myndband af Magnúsi Inga Magnússyni, eiganda Texasborgara og Sjávarbarsins hefur gengið sem eldur um sinu um netið. Í myndbandinu er Magnús Ingi staddur í Filippseyjum þar sem hann tekur viðtal við gúmmítrésbændur fyrir ÍNN. Athygli hefur vakið að hann notar íslensku og ensku til skiptis í viðtalinu og spyr gúmmítrésbændurna meðal annars út í „gúmmí“ en ekki „rubber“ eins og það leggst á ensku. „This is your brother... and he take care of the gúmmítré,“ segir hann meðal annars á ísl-ensku.
Ánægður með mikil viðbrögð
Viðmælendur hans eru systkini sem rækta gúmmítré en hann spyr þau út í ferlið. Systirin lýsir því hvernig skorið er í tréð og latex lekur úr, svo setji þau sýru í til þess að latexið harðni. Þá grípur Magnús Ingi fram í og útskýrir: „Heyrðu ég er nú ekki alveg að mér í þessu en sem sagt það kemur svona safi úr trénu og svona, þeir setja eitthvað efni í þetta þannig að þetta verði hart. Er það ekki rétt?” spyr hann annan bóndann og hlær. Við það brosir bóndinn ringlaður í myndavélina.
„Þetta er bara orginal ég,“ segir Magnús Ingi í samtali við Stundina. Hann kveðst vera mjög ánægður með viðbrögðin sem myndskeiðið hefur vakið. „Í þessum þáttum reyni ég að hafa fróðleik, skemmtun og afþreyingu,“ en það telur hann viðbrögðin sýna að hafi tekist. „Ég er bara aldrei að látast,“ segir hann um sletturnar í viðtalinu. „Þetta er bara orginal ég. Íslendingar tala svona erlendis.“ Aðallega er þetta þó bara skemmtun, segir Magnús Ingi: „Ég er skemmtikraftur“. Hér að neðan má sjá viðtalið umtalaða.
Athugasemdir