Jóhannes Þór Skúlason, aðstoð­ar­maður Sig­mundar Davíðs Gunn­laugs­sonar for­manns Fram­sókn­ar­flokks­ins, telur að frétt Vísis um að Sigurður Ingi Jóhanns­son for­sæt­is­ráð­herra njóti stuðn­ings meiri­hluta þing­manna Fram­sókn­ar­flokks­ins til að gegna for­mennsku í flokknum byggi ein­ungis á get­gátum. Þetta leiðir hann af því að í upp­hafi frétt­ar­innar kemur fram að Sigurður Ingi sé „að öllum lík­indum“ með meiri­hluta þing­flokks­ins að baki sér. 

Í frétt Vísis segir meðal ann­ars: „Samkvæmt áræð­an­legum heim­ildum frétta­stofu eru allar líkur á að Sigurður Ingi njóti meiri­hluta­fylgis í þing­flokknum þótt for­mað­ur­inn eigi sér þar dygga stuðn­ings­menn. Þeirra á meðal eru Ásmundur Einar Daðason og Vigdís Hauks­dóttir sem bæði ætla að hætta á þingi í haust og Gunnar Bragi Sveins­son sem mun leiða flokk­inn í Norð­vest­ur­kjör­dæmi.“

Jóhannes Þór gerir athuga­semd við frétt­ina á Facebook, þar sem blaða­maður á Frétta­blað­inu hefur deilt henni. „Að öllum lík­indum? Eru fréttir nú byggðar á skyggni­lýs­ingum? Eða ósk­hyggju?“ spyr Jóhannes. Þá segir hann „svo­lítið sér­stakt að sjá heila frétt byggða á get­gátum“. Fréttin segi ekk­ert hald­bært um það sem þó eigi að heita aðal­efni hennar.

Sig­mundur Davíð hefur sjálfur einnig gagn­rýnt fjöl­miðla fyrir frétta­flutn­ing af sér og meintu tölvu­inn­broti: