Hugleiðsla er mörg þúsund ára gömul aðferð við að friða hugann. Svo gömul reyndar að sumir vísindamenn hafa leitt að því líkum að hugleiðsla hafi jafnvel átt þátt í líffræðilegri þróun mannskepnunnar.
Flest trúarbrögð hafa fléttað hugleiðsluna rækilega inn í daglegt líf sinna meðlima. Bænir, möntrur og aðrar athafnir innan trúarbragðanna eru oftar en ekki blandaðar með einhverjum hlutum hugleiðslunnar.
Engin þörf er hins vegar á því að aðhyllast trúarbrögð til þess að geta stundað hugleiðslu og eru þess fjölmörg dæmi að veraldlegar manneskjur, jafnvel andsnúnar trúarbrögðum, geti stundað hana sér til góðs. En hverjar eru þessar ákjósanlegu afleiðingar þess að stunda hugleiðslu?
1. Heilinn og líðan
Æfingar í núvitund slá á þunglyndi
Rannsókn sem gerð var í fimm skólum í Belgíu á um 400 nemendum á aldrinum 13–20 ára leiddi í ljós að „nemendur sem tóku þátt í hugleiðslunámskeiði innan skólans sögðust upplifa minna þunglyndi, kvíða og stress í allt að hálft ár eftir að námskeiðinu lauk. Einnig voru nemendurnir ólíklegri til þess að þróa með sér önnur einkenni þunglyndis.“
Önnur rannsókn, sem gerð var við Kaliforníu-háskóla á sjúklingum sem höfðu þjáðst af þunglyndi sýndi fram á að hugleiðsla minnkaði niðurrifshugsanir og óuppbyggilegar skoðanir.
Enn önnur rannsókn sem birtist í Scientific American-tímaritinu benti til þess að hugleiðsla gæti verið jafn árangursrík í að meðhöndla þunglyndi og meðferð með þunglyndislyfjum.
Heimildir: ScienceDaily, Link Springer, Jama Network
Hugleiðsla hjálpar til við meðferð á þunglyndi óléttra kvenna
Konur í áhættumeðgöngu sem tóku þátt í tíu vikna jógaþjálfun í núvitund sáu umtalsverða fækkun í einkennum þunglyndis, samkvæmt rannsókn Michigan-háskóla. Hinar væntanlegu mæður sýndu einnig fram á aukna tengingu við ófædd börn sín. Niðurstöðurnar voru birtar í tímaritinu Complementary Therapies in Clinical Practice.
Heimild: Medical News Today
Hugleiðsla slær á kvíðaröskun, streitu og eykur tilfinningalegt jafnvægi
Rannsókn Wisconsin-Madison-háskóla benti til þess að opin-meðvitund hugleiðsla minnkaði tengingar í þeim hluta heilans sem tengist kvíða og stressi. Þeir sem hugleiddu voru færir um að „fara frá einni stund yfir í aðra í straumi áreitis sem þeir voru látnir upplifa og voru ólíklegri til að festast í einu áreiti“. Hugleiðsla sem einblínir á opna meðvitund gengur út á að upplifa og fylgjast með án þess að þurfa að bregðast við áreiti. Er hún notuð til þess að bera kennsl á eðli mynstra í tilfinningum og hegðunum.
Heimildir: The Journal of Alternative and Complementary Medicine, Jama Network, NCBI, Wiley Online Library, The American Journal of Psychiatry, ScienceDirect, American Psychological Association, American Psychosomtic Medicine Journal , Medical News Today
Hugleiðsla minnkar einkenni felmtursröskunar (kvíðaröskunar)
Í rannsókn sem birt var í tímaritinu American Journal of Psychiatry voru 22 sjúklingar, sem greindir höfðu verið með kvíðaröskun og felmtursröskun, látnir hugleiða í þrjá mánuði ásamt kennslu í slökun. Niðurstöðurnar voru þær að 20 sjúklinganna fundu fyrir umtalsvert minni kvíða og streitu og voru þær breytingar staðfestar í eftirfylgni.
Heimild: American Journal of Psychiatry
Hugleiðsla eykur þéttingu gráa efnis heilans
Hópur vísindamanna við Harvard-háskóla, sem sérhæfa sig í taugavísindum, gerðu tilraun þar sem 16 einstaklingar fóru í gegnum 8 vikna námskeið í núvitund. Þar voru þeir leiddir í gegnum hugleiðslu og látnir beita núvitund í sínu daglega lífi. Hluti af niðurstöðum rannsóknarinnar voru sneiðmyndatökur. Sýndu þær fram á að þétting gráa efnis í heilanum hafði aukist á þeim svæðum þar sem lærdómur og minni, stjórn tilfinninga og upplifun af sjálfinu er að finna. Önnur rannsókn sýndi fram á stærri dreka (e. Hippocampal, svæði við miðju heilans) og meira magn af gráu efni í framheila hjá fólki sem hafði stundað hugleiðslu lengi.
Heimildir: Psychiatry Research Neuroimaging, ScienceDirect
Hugleiðsla eykur gríðarlega viðbragðsflýti heilans og getur minnkað svefnþörf
Rannsókn sem fór fram við Háskólann í Kentucky prófaði einstaklinga í fjórum mismunandi atriðum og rannsakaði áhrif þeirra á svefn. Fyrsti hópurinn breytti engu, annar hópurinn var látinn taka blund yfir daginn, þriðji hópurinn stundaði hugleiðslu og fjórði hópurinn var sviptur svefni og látinn hugleiða.
Þátttakendur skiptust í þrjá hópa; fólk sem aldrei hafði hugleitt, fólk sem hafði einhverja reynslu af hugleiðslu og að lokum einstaklingar sem stunduðu og höfðu mikla reynslu af hugleiðslu. Niðurstöður rannsóknarinnar voru að hugleiðsla hefði, í það minnsta til skamms tíma, jákvæð áhrif á svefn, jafnvel hjá fólki með enga reynslu af hugleiðslu. Einnig var sýnt fram á að fólk sem hefði mikla reynslu af hugleiðslu þurfti umtalsvert minni svefn heldur en það fólk sem stundaði enga hugleiðslu. Enn er þó verið að rannsaka hvort hugleiðsla geti komið í stað svefntíma eða hvort hægt sé að vinna upp svefnskuld með þeirri ástundun.
Heimildir: NCBI, DoctorsOnTM, Time Magazine
Hugleiðsla til lengri tíma eykur færni heilans í því að senda frá sér gamma-bylgjur
Í rannsókn á tíbeskum búddamunkum, sem gerð var af taugasérfræðingnum Richard Davidson frá Háskólanum í Wisconsin, var sýnt fram á að fólk með lágmarks reynslu af hugleiðslu sýndi fram á örlitla aukningu í gamma-virkni, en flestir munkar „höfðu gríðarlega aukna virkni, svo mikla að taugavísindamenn hafa ekki séð annað eins“.
Heimild: The Wall Street Journal
Hugleiðsla dregur úr misnotkun áfengis og fíkniefna
Fíklum og alkóhólistum hefur lengi verið ráðlagt að prófa ástundun hugleiðslu til þess að draga úr þráhyggjukenndri hugsun. Rannsóknir sem gerðar voru á föngum sem áttu við fíknivanda að stríða virtust benda til þess að hugleiðsla gæti dregið verulega úr áfengis- og fíkniefnaneyslu.
Heimild: Journal Of Alternative and Complementary Medicine
2. Hugur og virkni
Hugleiðsla eykur athyglisgáfu, einbeitingu og hæfileikann til að vinna undir álagi
Könnun sem Katherine MacLean frá Háskólanum í Kaliforníu bendir til þess að eftir þjálfun í hugleiðslu væru viðfangsefnin hennar færari í að halda einbeitingu, sérstaklega við verkefni sem þeim fannst leiðinleg og einkennast af endurtekningu.
Önnur rannsókn benti til þess að aðeins 20 mínútna hugleiðsla á dag væri nóg til þess að nemendur stæðu sig umtalsvert betur í prófum sem mældu greind, í sumum tilfellum allt að tíu sinnum betri en hópurinn sem ekki hugleiddi. Þeir stóðu sig einnig betur í verkefnum þar sem vinna þurfti úr upplýsingum sem voru hönnuð til þess að ýta undir stress sem fylgir skilum á verkefnum.
Þá voru jafnvel vísbendingar um að hugleiðendur væru með þykkari framennisbörk og hægra eyjablað í heila, og einnig að hugleiðsla gæti dregið úr líkum á greindartapi á efri árum.
Heimildir: Time Magazine, NCBI, Link Springer
Hugleiðsla auðveldar úrvinnslu úr upplýsingum og ákvarðanatöku
Eileen Luders, aðstoðarprófessor við Kaliforníu-háskóla í Los Angeles, hefur ásamt samstarfsfólki sínu komist að því að fólk sem stundað hefur hugleiðslu lengi er með fleiri fellingar í heilanum (krumpurnar sem gera heilanum kleift að vinna hraðar úr upplýsingum) heldur en fólk sem stundar enga hugleiðslu. Vísindamenn telja að fellingarnar séu ábyrgar fyrir því að heilinn sé betri í að vinna úr upplýsingum, taka ákvarðanir, mynda minningar og halda athygli.
Heimild: UCLA Newsroom
Hugleiðsla auðveldar þér að takast á við sársauka
Við Háskólann í Montreal voru 13 Zen-meistarar og 13 sambærilegir einstaklingar, sem ekki stunduðu hugleiðslu, látnir upplifa sama sársaukafulla hitann á meðan fylgst var með heilastarfsemi þeirra í MRI-heilaskanna. Niðurstöðurnar voru þær að Zen-meistararnir upplifðu minni sársauka. Reyndar sögðust þeir hafa upplifað minni sársauka heldur en heilaskanninn benti til þess að þeir væru að ganga í gegnum. Þannig að þrátt fyrir að heilinn hafi verið að fá sömu skilaboð um sársauka og hinir þátttakendurnir, þá upplifðu þeir hann ekki eins mikinn.
Heimildir: Time Magazine, NCBI, David Lynch Foundation
Hugleiðsla er meira verkjastillandi en morfín
Í tilraun sem var framkvæmd af Wake Forest Baptist Medical Centre sátu 15 heilbrigðir einstaklingar, sem höfðu enga reynslu af hugleiðslu, látnir sitja fjóra 20 mínútna tíma þar sem þeim var kennd hugleiðsla með því að einbeita sér að önduninni. Bæði fyrir og eftir hugleiðslukennsluna var heili þátttakenda skannaður með sneiðmyndatöku á meðan þeir voru látnir upplifa sársauka.
Dr. Fadel Zeidan, sem leiddi rannsóknina, sagði: „Þetta er fyrsta rannsóknin sem sýnir fram á að rétt rúmlega klukkustundar kennsla í hugleiðslu geti bæði minnkað upplifunina af sársauka umtalsvert og einnig sársaukavirkni heilans. (...) Við sáum töluverð áhrif – um 40% minnkun á sársaukaupplifun og 57% minnkun í óþægindum vegna sársauka. Hugleiðslan olli meiri minnkun í sársauka heldur en morfín eða önnur verkjastillandi lyf, sem venjulega minnka sársauka um 25%.“
Heimild: Huffington Post
Með hugleiðslu má hafa hemil á ADHD (athyglisbrest og ofvirkni)
Í könnun sem gerð var á 50 fullorðnum einstaklingum með ADHD var hópurinn látinn undirgangast MBCT (Mindfulness-based cognitive therapy) [e. Huglæga atferlismeðferð byggða á núvitund]. Var mælanleg minnkun í ofvirkni, minni hvatvísi og aukinn hæfileiki í að „framkvæma-með-meðvitund“. Alls sögðust rannsakendur sjá merki um minnkun í öllum einkennum röskunarinnar.
Heimildir: Clinical Neurophysiology Journal, DoctorsOnTM
Hugleiðsla eykur hæfileikann til að halda athygli þrátt fyrir truflanir
Rannsókn sem Emory-háskólinn í Atlanta gerði benti til þess að þátttakendur með reynslu af hugleiðslu væru með fleiri tengingar í þeim hluta heilans sem geymir athyglisgáfuna. Þessar taugatengingar eru taldar hafa töluvert um þróun ýmissa hugrænna hæfileika að segja, eins og að halda athygli og að útiloka allt sem truflar einbeitingu.
Ennfremur sagði í niðurstöðunum að ávinning væri einnig að sjá í daglegu lífi fólks, sem bendir til þess að hugleiðslan hafi jákvæð áhrif á einbeitingu almennt.
Heimild: Frontiers Journal
Hugleiðsla kemur í veg fyrir að fólk hlaði á sig of mörgum verkefnum
Það er lífseig goðsögn að fólk sem tekur að sér fjölda verkefna í einu afkasti meira, auk þess sem það orsakar streitu. Að skipta á milli verkefna er erfitt fyrir heilann og lætur fólki líða eins og stöðugt sé verið að trufla það, auk þess sem fólk verður óánægðara meðan á vinnunni stendur.
Í rannsókn sem var framkvæmd af Washington-háskóla og Arizona-háskóla var starfsfólki í mannauðsstjórnun gert að sækja 8 vikna námskeið í annaðhvort núvitundar-hugleiðslu eða afslöppunartækni. Þeim var svo úthlutað streituvaldandi prófi þar sem þau þurftu að vinna fjölda verkefna á sama tíma, bæði fyrir og eftir námskeiðin. Starfsfólkið sem hafði lært hugleiðslu upplifði minni streitu og sýndi fram á betra minni í prófunum heldur en samanburðarhópurinn. Þeir skiptu einnig sjaldnar á milli verkefna og sýndu meiri einbeitingu þegar unnið var að hverju og einu verki.
Heimild: ACM Digital Library
Hugleiðsla bætir orkunýtingu heilans
Þegar heilinn þarf að taka eftir tveimur hlutum í röð, með hálfrar sekúndu millibili, missir hann oft af seinni hlutnum. Þetta er kallað „athyglis-eyða“.
Í tilraun sem gerð var við Kaliforníu-háskóla var röð handahófskenndra talna látin birtast á tölvuskjá, hver talan á eftir annarri. Í hverri lotu birtust ein eða tvær tölur á skjánum, eða þá að hann var auður. Að því loknu voru þátttakendur beðnir um að skrifa niður tölurnar sem þeir sáu.
Þátttakendur sem höfðu stundað hugleiðslu í þrjá mánuði höfðu talsvert betri stjórn á athygli sinni og sýndu meiri eftirtekt. Heili þeirra þurfti einnig minni orku til þess að vinna verkefnið og var með mun minni athyglis-eyðu.
Heimild: PLOS Biology
Hugleiðsla býr þig undir að takast á við streituvalda
Rannsókn sem framkvæmd var af All India Institute of Medical Sciences á 32 fullorðnum einstaklingum, sem aldrei höfðu hugleitt, sýndi fram á að ef hugleitt var fyrir atburði sem valda streitu voru neikvæð áhrif streitunnar umtalsvert minni.
Heimild: The Journal of Alternative and Complementary Medicine
Hugleiðsla eykur meðvitund um ómiðvitaðan huga þinn
Rannsókn sem gerð var við Háskólann í Sussex í Bretlandi komst að þeirri niðurstöðu að fólk sem stundar hugleiðslu bíður lengur eftir að hafa upplifað ómeðvitaðar hvatir áður en brugðist er við þeim. Einnig er það fólk minna móttækilegt fyrir dáleiðslu.
Heimild: New Scientist
Hugleiðsla eykur sköpunargleði
Rannsókn við Leiden-háskólann í Hollandi sýndi fram að að ástundun opin-meðvitund hugleiðslu (þar sem fylgst er með tilverunni án þess að bregðast við) hefur jákvæð áhrif á sköpun og fjölbreytta hugsun. Þátttakendur sem höfðu stundað hugleiðslu stóðu sig betur í verkefnum þar sem þeir voru beðnir um að koma með skapandi nýjar hugmyndir.
Heimild: The Journal of Alternative and Complementary Medicine
3. Líkami og heilsa
Hugleiðsla minnkar líkurnar á hjartasjúkdómum og heilablóðföllum
Samkvæmt Alþjóðaheilbrigðismálastofnuninni deyr fleira fólk úr hjartasjúkdómum á heimsvísu en úr nokkrum öðrum sjúkdómum.
Í könnun sem birt var árið 2012 var hóp rúmlega 200 einstaklinga í áhættuhóp boðið að annaðhvort sækja námskeið sem kenndi bætt mataræði og hreyfingu eða sækja námskeið í hugleiðslu. Á næstu fimm árum fylgdust rannsakendur með þátttakendum og komust að því að 48% minni líkur voru á hjartaáföllum og heilablóðföllum hjá þeim sem sátu hugleiðslunámskeiðið.
Rannsakendur sögðu hugleiðsluna „minnka umtalsvert líkurnar á andláti, hjartaáföllum og heilablóðföllum í sjúklingum sem áttu við slagæðasjúkdóma að stríða. Breytingarnar tengdust meðal annars lægri blóðþrýstingi og minni streitu.“
Heimildir: Time Magazine, American Heart Association, HealthCentral
Hugleiðsla hefur áhrif á genin sem stýra streitu og ónæmiskerfinu
Í rannsókn sem Harvard Medical School gerði var sýnt fram á að eftir ástundun jóga og hugleiðslu voru þátttakendur með meiri orkuframleiðslu, orkunýtingu og þol í hvatberum sem stýra ónæmiskerfinu. Þetta hafði svo í för með sér öflugra ónæmiskerfi og meira viðnám við streitu.
Heimildir: Bloomberg, NCBI, American Psychosomatic Medicine Journal, Journal of International Society of Psychoneuroendocrinology
Hugleiðsla lækkar blóðþrýsting
Klínískar rannsóknir hafa sýnt fram á að ástundun Zen-hugleiðslu minnkar streitu og lækkar blóðþrýsting. Aðrar rannsóknir hafa skilað svipuðum niðurstöðum, þar sem allt að ⅔ þátttakenda með of háan blóðþrýsting voru með umtalsvert lægri blóðþrýsting eftir þrjá mánuði af hugleiðslu. Var í kjölfarið hægt að draga töluvert úr lyfjagjöf hjá þeim einstaklingum. Þetta er talin afleiðing þess að afslöppunin veldur myndun nituroxíð, sem opnar æðarnar meira.
Heimildir: The Journal of Alternative and Complimentary Medicine, NPR News
Hugleiðsla slær á bólgusjúkdóma
Rannsókn sem framkvæmd var í Frakklandi og Spáni við UW-Madison Waisman Centre bendir til þess að ástundun hugleiðslu valdi bæði genatískum- og sameindabreytingum á þátttakendum sínum. Tóku rannsakendur eftir fækkun gena sem eru líklegri til að valda bólgum, sem svo veldur sneggri líkamlegri bata í kjölfar streituvaldandi ástands.
Heimildir: University of Winsconsin Madison, HealthCentral, Medical News Today
Hugleiðsla getur komið í veg fyrir asma, gigt og bólgur í meltingarfærum
Í rannsóknum sem gerðar voru af taugasérfræðingum við Háskólann í Wisconsin-Madison var þátttakendum skipt í tvo hópa og þeim kynntar ólíkar aðferðir við að takast á við streitu. Annar hópurinn lærði hugleiðslu á meðan hinn hópurinn sat námskeið í næringarfræðum, líkamsrækt og tónlistar-þerapíu. Niðurstöður rannsóknarinnar voru að hugleiðsla væri umtalsvert betri í að takast á við og koma í veg fyrir sjúkdóma sem geta verið afleiðingar streitu, til dæmis gigt, magabólgur og asma, heldur en aðrar aðferðir sem bæta eiga andlega velferð.
Heimild: Medical News Today
Hugleiðsla hjálpar til við að takast á við fyrirtíðarspennu og tíðahvörf
Tugir rannsókna sem birst hafa í fjölda vísindarita benda allar til þess að hugleiðsla geti slegið á sársauka og einkenni sem fylgja fyrirtíðarspennu og tíðahvörfum.
Heimild: The Journal of Alternative and Complementary Medicine
Núvitundar-hugleiðsla dregur úr líkum á Alzheimer og ótímabærum dauða
Niðurstöður rannsóknar sem birt var í vefritinu Brain, Behavior and Immunity benda til þess að 30 mínútna hugleiðsla á dag dragi verulega úr einmanaleika, minnki líkurnar á hjartasjúkdómum, þunglyndi, Alzheimers og ótímabærum dauða.
Heimild: HealthCentral
Hugleiðsla hjálpar sjúklingum með vefjagigt
Í rannsókn sem birtist í tímaritinu PubMed gengu 11 sjúklingar með vefjagigt í gegnum 8 vikna þjálfun í hugleiðslu. Niðurstöður rannsakenda voru að umtalsverð bæting hefði verið á almennri heilsu þátttakenda. Einkenni eins og stífni, kvíði og þunglyndi höfðu öll minnkað. Einnig var mikil aukning á dögum þar sem þátttakendum „leið vel“ auk þess sem dögum þar sem þeir misstu úr vinnu vegna veikindanna fækkaði.
Heimildir: NCBI (1), NCBI (2), Psychotherapy and Psychosomatics Journal
Hugleiðsla róar hjartslátt og öndun
Í rannsókn sem birtist í Korean Association of Genuine Traditional Medicine var sýnt fram á að fólk sem var látið stunda hugleiðslu hafði umtalsvert rólegri hjartslátt og öndunartíðni í allt að 8 mánuði eftir að þjálfuninni í hugleiðslu lauk.
Heimild: KoreaScience
Hugleiðsla gæti jafnvel hjálpað til við að takast á við HIV
Eitilfrumurnar, eða einfaldlega CD4 T frumur, eru „heili“ ónæmiskerfisins og samhæfa aðgerðir þess þegar líkamanum er ógnað. Það eru einmitt frumurnar sem HIV leggst hvað harðast gegn, vírusinn skæði sem veldur eyðni og um 40 milljónir manna um heim allan þjást af. Vírusinn tætir smám saman í sundur allar CD4 T frumurnar og veikir þannig ónæmiskerfið.
En ónæmiskerfi eyðnisjúklinga stendur frammi fyrir öðrum óvini á sama tíma – streitu, sem getur hraðað eyðingu CD4 T frumna. Vísindamenn við Kaliforníu-háskólann í Los Angeles hafa nú birt þær niðurstöður að ástundun hugleiðslu hafi stöðvað eyðingu CD4 T frumna í HIV-sjúklingum sem þjást af streitu, og þannig hægt á framgöngu sjúkdómsins.
Vísindamennirnir settu af stað átta vikna kennslu í hugleiðslu sem hafði það markmið að draga úr streitu. Þeir prófuðu þessar mismunandi aðferðir svo á 48 fullorðnum einstaklingum sem voru bæði undir mikilli streitu og með eyðni. Þeir einstaklingar sem tóku þátt í átta vikna kennslunni sýndu enga hnignun í fjölda CD4 T frumna, sem bendir til þess að þjálfun í hugleiðslu geti stöðvað hrörnun þeirra frumna. Aftur á móti sýndi hópurinn sem borið var saman við, sem hafði enga hugleiðslu stundað, umtalsverða hnignun í CD4 T frá því mælingar hófust, sem er dæmigerð fyrir þróun sjúkdómsins.
Heimild: ScienceDaily
Hugleiðsla gæti gert þér kleift að lifa lengur
Telomeres eru sá hluti litninga sem ákvarðar hvernig frumur eldast. Þrátt fyrir að rannsóknir séu ekki afgerandi enn, þá eru vissar niðurstöður sem benda til þess að „ákveðnar tegundir hugleiðslu geti haft jákvæð áhrif á líftíma telomere í litningum, og þar með frumna, með því að draga úr streitu og streituvöldum. Auk þess eykur hugleiðslan jákvætt hugarfar og veldur hormónabreytingum sem geta enn bætt líftíma telomere í litningum.“
Heimild: Wiley Online Library
Hugleiðsla getur slegið á sóríasis
Andleg streita getur orsakað bólgur í líkamanum. Þegar stutt kennsla í hugleiðslu var spiluð fyrir sjúklinga á meðan þeir voru í meðferð með útfjólubláum geislum varð það til þess að sóríasis-útbrot þeirra minnkuðu meira en í sambærilegum hópum þar sem engin hugleiðsla var notuð.
4. Sambönd
Hugleiðsla eykur samkennd og jákvæðni í samböndum
Í búddískum hefðum stundar fólk metta, hugleiðslu sem gengur út á ást og samkennd. Þar einbeitir sá sem hugleiðir sér að því að þróa með sér velvild og samúð í garð allra lifandi vera. Samkvæmt rannsókn Emory-háskóla geta slíkar æfingar aukið hæfileika fólks til þess að finna til samkenndar með öðru fólki með því að lesa í andlitstjáningu þeirra.
Önnur rannsókn bendir til þess að hinar jákvæðu tilfinningar sem verða til með því að hlúa að samkennd hafi aðrar áhugaverðar afleiðingar í för með sér, til dæmis meiri kærleik í eigin garð, að samþykkja sjálfan sig, sækja sér frekar hjálp og jákvæðari sambönd við annað fólk. Auk þess eykur það þá tilfinningu hjá viðkomandi að hann sé hæfur til að lifa sínu lífi.
Heimildir: ScienceDaily, NCBI, PLOS One
Hugleiðsla dregur úr félagslegri einangrun
Í rannsókn sem birtist í American Psychological Association, áttu einstaklingar sem höfðu aðeins stundað nokkrar mínútur af hugleiðslu auðveldara með að finna fyrir félagslegri tengingu við nýja einstaklinga. Niðurstöðurnar benda til þess að aðferðina mætti nota til þess að auka jákvæðar félagslegar tilfinningar hjá fólki og draga þannig úr félagslegri einangrun.
Heimild: American Psychological Association
Hugleiðsla dregur úr einmanaleik
Könnun Carnegie Mellon-háskóla bendir til þess að þjálfun í hugleiðslu sé mjög gagnleg til að draga úr tilfinningunni fyrir einmanaleik, sem svo dregur úr líkunum á þunglyndi, sjúkdómum og öðrum afleiðingum neikvæðra tilfinninga. Hugleiðsla dregur einnig úr þörfinni til að borða vegna neikvæðra tilfinninga, sem minnkar svo líkurnar á þyngdaraukningu.
Heimildir: ScienceDirect, DoctorsOnTM
5. Annað
Aðrar áhugaverðar staðreyndir um hugleiðslu:
-
Að segja OM hljóðið (aldagömul mantra) fyrir skurðaðgerð hjálpar til við undirbúning og bata í kjölfar hennar. (Heimild: Time)
-
Þeir sem hugleiða geta haft áhrif á raunveruleikann í kringum okkur, á sviði skammtafræðinnar. (Heimild: Collective Evolution)
-
Því hefur verið haldið fram að æfingar í hugleiðslu geti bætt kynlífið. (Heimildir: Pshychology Today, Clare Josa , Mindful)
-
Dregur úr fordómum. (Heimild: Sage Journals)
6. Niðurstaða
Ýmislegt virðist því benda til þess að vísindin séu nú að staðfesta reynslu þeirra milljóna sem hugleiða á hverjum degi; að hugleiðsla bæti heilsuna, komi í veg fyrir sjúkdóma, auki hamingju og bæti frammistöðu í nánast hvaða verkefni sem er, andlegu eða líkamlegu.
Ýtarefni, ef þú hefur áhuga:
Veftímaritið Healthline velur á hverju ári bestu smáforritin til að hugleiða í gegnum. Hér er listi þeirra fyrir árið 2016.
Mörgum þykir best að byrja að hugleiða með svokallaðri leiddri hugleiðslu, og er þá vefurinn og smáforritið Headspace góð leið til að hefjast handa.
Vefurinn A Life of Productivity er með fína kynningu á því hvernig gott sé að hefja hugleiðslu.
Vefsíðan WikiHow er að sjálfsögðu með stutta leiðsögn á því hvernig skuli hugleiða.
Vefsvæðið Live and Dare er hér með ágætis yfirlit um hinar ýmsu mismunandi tegundir hugleiðslu.
Athugasemdir